Ich Gedrut von Plenich tu^en chunt allen den, di nu lembtich sint vnt her nach chumpftich sint, die den gegenwortigen prief an sehent oder ho^erent lesen, daz ich mit guetlichem willen meiner chinde, meiner sun Seifrides vnt Heinrichs vnd meiner tohter Alhaiden vnt Perhten, mich ains lehens datz Nidern Slevntze, da Chunrat vnt Vlrich ovf sitzent, daz ovf zewelf shillinge phenninge mit sampt dem weiso^et ist geahte, daz ovch mein wiert her Heinrich von Plenich vor seinem tode emaln peî seinem gesuntem leip geshapht het hintz dem gotshous ze Altenburch, do er sein legerstat erwelt het, doch also, daz ich oder meinev chinde daz selbe lehen nach seinem tode ob wier wolten vuer fumfzehen phunt ledigen solten, vnt daz man vns des stat tun solt, gentzlich verzigen han, vnt an allen satz ledichleich ovf gegeben han mit allen meinen gerben vnt allen meinen nachomen dem selben gotshous ze allem dem rehte als wier iz her praht heten in nutze vnt in gver, vnt han daz getan durch meins wirtes sel willen vnt ovch der meinen vnt aller vnser vodern. Dar zu ovch hot iz mein sun Seifride an vnser stat mit seiner hande geselt vnser vroun vnt den heiligen ze hern, die da rastund sint, ovf den alter des gueten sant Lamprehts an dem tage, da der selige herre von Plenich ze der erde pestatte wart, do ouch wier des iungisten tages enpeiten wellen. Darvber dennoch lob ich daz, daz ich des selben gutes gwer vnd sherm sein wil mit sampt meinen chinden nach lants reht vnd nach aigens reht, vnt iz ovch ver antwurten wil, ob sein durf geshieht, dem vor benantem gotshousse. Vnt daz daz vu^erbaz also stet sei vnt vnzebrochen, des gib ich dem selben gotshous disen prief vber dise red ze ainer rehten vrchunde versigelt mit meines wirts insigel, des vor benanten herren von Plenich, vnd mit der edelen herren jnsigel, hern Chunrats von Pu^ochperch, hern Albers von Hohenstain vnt hern Rapots des pu^orkcrauen von Gors, die ich dar zue gepeten han vnt die ovch en antwu^ortte gewesen sint pei dieser red vnt îer ovch gezeuge sint mit andern frumen lovten, den si ovch chund ist. Daz sint die zeuge:her Vlrich der Mertz von Chotzendorf vnt sein sun Otte, her Chunrat von Rout vnt sein sun Andre, her Otte der Chrich von Vreitslarn, her Heinrich von Pach, Heinrich von Wiltperch, Alber vnt Lovtwein von Vuenvelde, Heinrich von Dahpach, Leb von Plenich, Wernhart von Obern Plenich, Gotschalich von Vronhouen, Lovtwein von Wolfpaizzinge, Liebart von Wreitslarn, vnd Herwich von Plenich, vnt ander frumer lovt genuch. Daz ist geshehen vnt ist der prief gegeben nach Christes gepurde vber tovsent iar zwai hundert iar, in dem drittem vnt nevncigistem iar, datz Altenburch an dem Suntage vor sant Cholmans tach.

Source Fulltext: BURGER, Urkunden Altenburg (=FRA II/21, 1865) S. 70-71