Ich Hadmar von Sunberch der iunge tuen chund alle den, di disen prive ansehent oder lesent, di nu sint oder hernach chumftich sint, daz ich mit verdachtem mu^et mein selbes, vnt darzue mit guetlihem willen miener hovsvroun vron Reihkarten vnt mit rat meins herren hern Seifrides des abts von Altenburch, vnt meiner getrewen diner Fridreichs des Hinderburger vnd Gerunges des Tausel, want des mensen leben vngewis ist, mein gescheft also tuen, ob ich ovf diser raise von diser werlde vervar, daz in gots hant ist, mein legerstat zem ersten erwel hintz Altenburch, vnd durch meiner sel hail vnd ovch aller meiner vodern demselben gotshovs schaff mein aigen ze Porssenprunne, daz mich ledichleich angehort vnd von meiner muter anerstarben ist, zwen weingarten vnd zwelf shillinge gelts, daz iz daz gentzlihen habe. Darvber dennoch han ich geschaft demselben gotshovs meinen hengest vnd meinen halsperch, vnd zwaintz mutt chorns ze Rassenloch, da man mich mit pestatte. Vnd daz ditz gescheft stet sei vnt vntzebrochen, darvber gib ich disen prive versigelt mit meinen jnsigel ze einer rechten vrchunde. Daz ist geschehen vnd ist der prive gegeben nach Christes gepurt vber tausent iar vnd in dem dritten hundertisten iar, des Heritages in der Chrevtzwochen, ze Altenburch in dem chloster.

Source Fulltext: BURGER, Urkunden Altenburg (=FRA II/21, 1865) S. 96-97