Ich Hadmar der Sunnerberger von Asparn tuen chunt allen den, di disen prive ansehent, horent oder lesent, daz ich mit gesuntem leib vnd mit verdahtem mute mein geschefft tuen von meinem varundem guet. Zem ersten anderhalbe hundert phvnt, da man mit ablege nach gnaden allen den, den ich ze vnreht iht enphv^ert han. Darnach so schaffe ich vumftzig phvnt vnder mein arme diener. Darnach shaff ich drithalbe hvndert phvnt, do man von stifte, da zehen durftigen ebichleich von getroste werden. Darnach shaff ich, ob got vber mich gepevtte, vumftzig phvnt, di man tail in ellev chloster in dem lande, daz man mein darinne gedenche. Darnach so scha^effe ich ze dem closter, da ich denne pestattet wirde, vumftzige phvnt, da man vmbe chovffe vumfe phvnt geltes, von den man alle iar pege meinen iartach vnd aller meiner vodern mit almusen vnd mit tailunge armer levtte. Darnach schaff ich der selben sampnunge in dem selben chloster vumftzig phvnt, da man vmb chovffe, daz man ze isleher chotemper in dem iar in ein mal gebe, daz si meiner sele vnd aller meiner vodern dester vleizichleicher gedenchen. Vnd wil daz duze gescheffte wer von Weihnachten, di nv chumftich ist vber ain iar, vnd enphilch ovch daz dem abte von Altenburch vnd meinen oehem Stephanne von Meissowe, vnd meinem prvder Hadmarn von Sunneberch hintz iren trewen, daz si daz volvuren, als si got darvmbe antwurtten schullen. Vnt daz selbe gu^et sol in geantwurten Rudel mein amman vnd Gerunche mein choufman , des habent si ir trewe gegeben dem abte vnd meinen prvder Hadmarnn den vorbnanten. Vnt daz daz gescheffte als vorgeschriben ist, stet sei, gib ich disen prive ze ainer vrchunde, versigelt mit meinem jnsigel, mit des abtes jnsigel, mit meines oehems jnsigel, vnd mit meines prvder jnsigel. Daz ist geschehen vnd ist der prive gegeben in dem dreutzehentem hundertigistem iar nach Christes gepurt, an sant Othmars abent datz Asparn.

Source Fulltext: BURGER, Urkunden Altenburg (=FRA II/21, 1865) S. 97-98