Ich Ru^eger von Pusleinstorf tun chvnt allen den, di nu lembtich sint vnd hernach chvmftich sint, di den gegenburtigen prive ansehent oder lesent, daz ich mit verdohtem mv^et mein selbes, vnt mit meiner hovsvroun vron Benedicten gvntste, vnt vnserr chinde, Heinreichs, Elspeten vnt Gedrovtten, vnt aller vnser gerben gutem willen, han verchovffet ain halbez lehen, daz glegen ist ze Celderndorf, daz mein aigen gewesen ist, vnt davon jchz mochte vreileich gegeben swem ich wolte, hern Seifride dem erbern abte vnt der sampnunge von Altenburch, jn vnt irm gotshovs, vmb viertzehenthalbe phvnt Wienner mvnzze, vnt pin des selben guts vnt der selben phenninge gar vnt gentzlich gewert. Vnt darvber durch pezzer sicherhait, so setze wir vns, jch Ru^eger, vnt jch Benedicte di vorbnanten, vnt di no hernach bnante werdent, daz pin ich Ortolf, Rugers pruder, vnt jch Albreht von Pusleinstorf, vnt ich Ortolf der Chyrchpekche, Albrehts aidme, vnt jch Otte der Chrevzpekche von Celderndorf, vnt jch Chvnrat der Rorer, ovch von Celderndorf, den eê bnanten herren, dem abte vnt seiner sampnunge vnd irm gotshovs von Altenburch vber daz vorbnante aigen ze Celderndorf ze rehtem sherm vu^er alle ansprach, als aigens reht ist vnt des landes gewonhait, vnt swelhez vnder vns di hîe bnant sint niht enwer, so sol daz selbe gotshovs allen seinen schaden, ob iz dhainen neme, haben datz den andern, also hab wir globt, vnt haben des vnser trewe gegeben. Vnt daz ovch der chovf vnt di rede vurbaz ebichleich ste^at seî vnt vntzebrochen, des gib jch Ru^eger von Pusleinstorf, der eê bnant ist, dem selben gotshovs von Altenburch, daz ofte bnant ist, ze rehter vrchvnde disen prive, want jch aigens jnsigels niht enhan, versigelt mit der edeln herren jnsigel, mit hern Haidenreichs des pu^orkcraven von Gors vnd hern Hadmars jnsigel des jungern von Sunberch, di der rede ovch gezevge sint, mit andern vrumen leutten, di dapei gewesen sint vnd der rede gezevg sint. Daz sint di gezevge: der Chvnrat von Revt, der Chvnrat Gnevsse von dem Wolfshove, der Wernhart von Obernplenich, der Otte Weidner von Zvntkera, Hainreich der Dachpekche, Hainreich sein sun, Hainreich von Wiltperch, Gotshalich von Vronhoven, Weichart vnt Otte von Grueb, Otte der Mertze, Ortolf sein pruder, Fridreich der Hinderburger, Wulfinch der Stifner, Chunrat der Sultzcer, Wolfker der Paltweiner, Mertte der Polster, Stephan sein pruder, Chraft vnt Wolfker der Durrenpekche von Gors, vnt ander vrume leutte genvg. Daz ist geschehen vnt ist der prive gegeben nach Christes gepurt in dem ersten vnd drevtzehentem hvndertisten jar, datz Pusleinstorf in meinem hovs, an sant Gregorgen tach.

Source Fulltext: BURGER, Urkunden Altenburg (=FRA II/21, 1865) S. 98-99