Ich Vlrich der Fvchs von Fvchsperch vnd ich Jevte sein havsvrowe, wir veriehen vnd tvn chvnt allen den, die disen prief lesent oder horent lesen, die no lebent vnd hernach chvnftich sint, daz wir mit vnser erben gvtem willen vnd gvnst, mit verdahtem mvte vnd mit gesamter hant, zv der zeit do wir iz wol getvn mohten, verchavft haben vnsers rehten aigens [in dem Pevchreiche, ain halp phvnt Wienner phennige^*] geltes da zu Prvnne, da ze Pevgen sechs schillinge phenninge geltes, da ze Sand Pernharten dreizehen schillinge phenninge geltes, da ze Fronhoven sechstehalben schilling phenninge geltes. Die vorgenanten gvlte alle haben wir geben mit allem dem nvtz vnd reht, als wir sie jn aigens gewer herpraht haben, vmb ains vnd dreizzich phvnt Wienner phenninge, der wir reht vnd redlichen gewert sein, dem erbaern manne hern Rvedgeren dem Piber von Grvenenberch vnd seiner havsvrowen vron Diemvden, vnd allen irn erben, ledichlichen vnd vreilichen ze haben vnd allen irn fromen damit ze schaffen, verchavffen, versetzzen vnd geben, swem sie wellen, an allen irresal. Vnd darvber dvrh pezzer sicherheit so setzzen wir vns, ich Vlrich der Fvchs von Fvchsperch, vnd ich Jevte sein havsvrowe vnd ich Vlrich, vnd ich Otte, vnd ich Chvnrat ir svne, vnverschaidenlichen fvr vns vnd fvr alle vnser erben dem vorgesprochen hern Rvedgern dem Piber vnd seiner havsvrowen vron Diemvden vnd allen irn erben vber die vorgesprochen gvlte jn dem Pevchreiche ze rehtem scherme fvr alle ansprache, als aigens reht ist vnd des landes reht ze Oesterreiche. Vnd geben jn darvber disen prief ze ainem sihtigen vrchvnde vnd ze ainem offen gezevge vnd ze ainer ewigen vestnvnge diser sache, versigilten mit vnsern jnsigiln. Vnt sint avch des gezevg: her Wichart von Toppel, her Vlrich der alte von Merchenstain, her Vlrich sein svn, her Dietrich von dem Hevslein, her Wulfing sein prvder, vnd ander frvme levte genveg, den dise sache wol chvnt ist. Diser prief ist geben ze Wienne, do von Christes gebvrt waren ergangen drevzehen hvndert jar, jn dem ersten jare, darnah an sand Michels tage.

Source Fulltext: BURGER, Urkunden Altenburg (=FRA II/21, 1865) S. 99-100