Ich Petersse hern Vlriches wittiwe von Wolfgerstorf, dem got gnade, vergihe vnd tvn chvnt allen den, die disen prief lesent oder horent lesen, die no lebent vnd hernach chvnftich sint, daz ich mit meiner erben gvtem willen vnd gvnst, vnd mit verdahtem mvte, vnd avch zv der zeit do ich iz wol getvn mohte, verchavft han meins rehten aigens dreizzich phenninge geltes vnd fivnftehalp phvnt phenninge geltes Wienner mv^entz avf aeckern da ze Haedrichestorf bei Valchenstain mit allem dem nvtz vnd reht, als ich sie in aigens gewer herpraht han, vmb sechs vnd dreizzich phvnt Wienner phenninge, der ich reht vnd redlichen gewert bin, dem erbaern manne hern Hadmarn von Svnnenberch gesezzen da ze Asparn, ledichlichen vnd vreilichen ze haben vnd allen sein frvmen damit ze schaffen, verchavffen, versetzzen vnd gebem swem er welle an allen irresal. Vnd darvber dvrh pezzer sicherhait so setzzen wir vns, ich vorgenante Petersse, hern Vlriches wittiwe von Wolfgerstorf, vnd ich Chrast ir aidem, vnd ich Katreine sein havsvrovve, der vorgesprochen vron Peterssen tohter, vnverschaidenlichen hern Hadmarn von Svnnenbern (sic) vber die vorgenanten gvlte ze rehtem scherme fvr alle ansprache als aigens reht ist vnd des landes reht ze Osterreiche. Vnd geben im dar vber disen prief ze ainem sihtigen vrchvnde vnd ze ainem offen gezevge vnd ze ainer ewigen vestnvnge diser sache, versigilten mit vnsern jnsigeln vnd mit hern Otten jnsigil von Zelkingen, vnd mit hern Vlriches jnsigil von Pilihdorf, die diser sache gezevg sint mit ir jnsigiln. Vnt sint avch des gezevg: her Wulfing von Svnnenberch, her Otte der Tvrse von Rvhenecke, her Marchart von Mistelbach, her Dietrich von Pilihdorf zv den zeiten hofmarschalch, Otte sein prvder, Hadmar von Raschenla, Levtwein von Svnnenberch, Andre sein pruder, vnd ander frvme levte genvch. Diser prief ist geben ze Wienne, do von Christes gebvrt waren ergangen drevzehen hvndert jar, jn dem vierden jare, darnah an dem Perhtage.

Source Fulltext: BURGER, Urkunden Altenburg (=FRA II/21, 1865) S. 107-108