Ich Sifrid van Plench vergich vnd tuen chvnt allen den, die disen prief sehent lesen oder horent lesen, di nv lebent vnd hernach chunftich sint, daz vro Gedraut heren Engelprechtes tochter van Pach, Haintzleins witibe van Lindenberch, zv mir chom mit ir vriunt rat, vnd pat mich, daz ich ir mein willen dozue geb, daz si durich irer durft willen verchauft anderhalb lehen datz Nideren- Sleuntz, die si zu den ziten van mier ze lehen het, der pet gebert ich sei, vnd hat dev vorgenant vro Gedraut die anderhalb lehen verchauft mit zitigen rat vnd mit verdochtem muet aller irrer erben, vnd auch zu der zit do si iz wol getuen macht, vnd hat die vorgenanten anderhalb lehen datz Nideren-Sleuntz gechauft wideren von Gedrauten vnd ir erben Liewart der Julian vnd sein hausvraw vro Marigret vnd irev chind, vm zwai vnd drizzich phunt phenning Wienner munizz, vnd ist vro Gedraut vnd ir erben der selben phenning gewert redlich vnd recht. Vnd ich Sifrid van Plench han die anderhalb lehen dotz Nideren-Slevntz gelihen zu rechtem purchrecht nach des landes recht ze Osterich Liewartem dem Julian vnd seiner hausvrawen vron Marigreten vnd ir paider chinden, mit soliher beschaidenhait, daz mir Sifriden van Plench vnd mein erben Liewart vnd sein hausvraw vro Marigret vnd ir erben alle jar geben vnd dienen schullen an sant Jorigen tach van dem gantzen lehen dotz Nideren-Sleuntz zehen phenning, vnd sol domit ledich vnd geruebt sein van ainem jar ze dem anderen jar an alle arigliste. Daz nv dev red vnd dev sache stet vnd gantz hinvuer beleib vnd vnzebrochen, dorvm gib ich Sifrid van Plench Liewartem dem Julian vnd seiner hausvrowen, vron Marigreten vnd iren chinden den prief zv ainem offen gezeug diser sache versigelt mit meim jnsigel, vnd zu pezzerer sicherhait versigelt mit des erberen herren jnsigel, hern Stephans van Meissaw des marschalichs in Osterrich, vnd mit den gezeugen die hernach geschriben stent: her Wulfinch van Svnberch, her Wolfkanch van Nevndorf, her Fridrich van Durrenbach, her Walbrvn der Zink, her Vlrich van Chadaw vnd sein veteren Dietmar vnd Michhel van Chadaw, Stephan heren Reimares sun, Ortolf der richter van Missaw, Hainrich der richter van Egenwurch, vnd ander vrum leut genuech, den die sache wol chunt vnd gebizzen ist. Der prief ist geben, do von Christes gewurt ist gebesen tausent jar drevhundert jar, darnach in dem vumften jar.

Source Fulltext: BURGER, Urkunden Altenburg (=FRA II/21, 1865) S. 108-109