Ich Gerdraut Almares haussvrau van Mulveld tuen chunt allen den, die nu lebent vnd hernoch chunftich sind, die disen brief ansehent, daz ich durch recht nottverft mein vnd meiner chind Vlreiches vnd Sopheýn vercheft hon apte Seivriden vnd seinem goteshaus ein hofstat da ze Vuccla, die sibmzich phennige dient, mit guetleichem willen meiner vorgenanten chinder, vm vierdhalbe phunt phenninge, der ich gor gewert ward, dorvmme daz ich mich vnd meinev chind dovan neret, vnd wand ich dem vorgenanten goteshaus ander gewishait nicht macht getuen, den daz ich pat den erwerigen herren heren Haidenreichen den puergrouen von Gors, daz er denselben chaufe westetigicht mit seinem insigel vnd auch gezeuch wer mit andern piderem leuten, die dopei waren vnd sein auch gezeuch sind; daz ist: mein her Rapot, her Herchenger, purgrouen von Gors, her Seiurid der Plenicher, her Werenhart von Plenich, her Otte der Weidner, her Chunrat der Gneusse, Hainreich, Chunrat, Hortunch sein sune, Chunrat der Sachssenganger, Wolfker der Duerrenpech, Hauch van Molt, zewen Artvlffen van Praitenaich, Almar van Speisendorf, Ludweich van Sand Marein, Dietel von Hezelnstorf, Zewichs sein brueder, Otte vnd Artolf die Merzen, Hainreich der Dachpeche, vnd ander piderwen leut genuech. Vnd ist daz geschehen, do van Christes gepuert was tausent iar vnd dreu hundert iar, in dem phunften iar, an dem Suntach in der Vasten, swan man singet Reminiscere, in dem haus ze Gors.

Source Fulltext: BURGER, Urkunden Altenburg (=FRA II/21, 1865) S. 109-110