Ich Mechthild vom Heireichs tuen chunt allen den, die lebent oder hernach chunftich sint, die disen brief ansehent, daz ich mich mit guetleichem willen aller meiner chinde vnd aller meiner gerben des guetes von Chelichtorf, daz mein wiert der Fridreich, dem got genade, het gegeben mit meinem guetleichen willen vnd aller seiner chinde durch got vnd durch seiner sele willen vnd aller vnser vadern vnd auch durch die libe vnser suns hern Albers, der prueder vnd priester ist des selben haus, darnach an der stunt geselt hon ich vnd mein sun Chunrat vnd mein sun Harembram vnd mein tohter Jevt mit guetleichem willen ander ierre guswistreit vnd der andern gerben mit vnsern handen auf den alter vnser vraun vnd des gueten sand Lambrechts vnd aller haligen, die do rastent vnd dem selben goteshaus gelubt han mitsand meinen vorgesprochen chinden scherm des selben guetes noch landes gewonhaiet vnd aigens recht. Vnd darvber gebe wier dem vorgenanten goteshaus ze v^orchunde vnd zue einer ewigen bestetigunge disen brief versigelt mit des erberigen herren insigel hern Hadmars von Sunberch des iungern vnd mit dem insigel meins wiertes, der in dembts iar verscaiden ist vnd iz auch dargegeben hat, vnd meines prueders hern Albers von Chirichperch, der dapej gebesen ist vnd auch zeuch ist vnd mit andern piderm leuten, die dopej gebesen sint vnd iz auch wol wizen, die sein zeuch sint, vnd an disem brief genent werdent. Des sind ee zeuch: her Chunrat der Gneause, her Johans van Waiedhofen, her Otte von Chirichperch, her Alber der Hem, her Dietmar von Chadau mein aiedem, Hainrech, Chunrat, Hortunch die Geneussen, her Alber der Pochsvez, her Gotschalich von Vraunhofen, her Almar von Peugen, her Ludwiech von Sand Marein, der Zewichs. Daz ist gechehen, do van Christ puert warn tausent iar, dre hundert iar, im phunfeten iar, am triten tage noch sand Johans tage ewangelist, als man in beget noch Hostern.

Source Fulltext: BURGER, Urkunden Altenburg (=FRA II/21, 1865) S. 110-111