Wir Wernhart von gotes gnaden pischolf des gotshavses ze Pazza^owe tvn chvnt allen den, die disen prief lesent oder horent lesen, die nv lebent vnd hernah chvnftich sint, daz fvr vns chomen sint der erbaer man her Hadmar von Svnnenberch an ainem taile, vnd Hadmar vnd Rapot die zwen prveder von Valchenberch an dem andern taile, vnd habent vns fvrgelait ainen gewerft vnd ainen chavf, den sie mit ainander habent gehapt, vmb zehen schillinge Wienner phenninge geltes irz rehten vreien aigens, der fivnf schillinge geltes ligent da ze Wolfpaizzingen avf ackern, an gensen vnd an hvenern, so ligent die andern fivnf schillinge geltes da ze Hittendorf avf ainer mv^elen, vnd in das vorgenant aigen gehoret die lehenschaft der chirchen ze Asparn, die des selben aigens ist, vnd die sie im darzv gigeben habent. Vnd baten vns der paiderthalben vleizchlichen, daz wir den selben chavf vnd avch die gabe von vnserm pischolflichen gewalt bestaetigiten dvrh irn willen, vnd wand iz ain gaistliche gabe ist vmb die lehenschaft der vorgenanten chirchen ze Asparn, so bestaetigen wir den selben chavf, als er von worten ze worten vnder Hadmars jnsigil vnd Rapotes jnsigil verschriben ist, vnd die gabe der vorgenanten chirchen, die sie im darzv gigeben habent, mit vnserm pischolflichen gewalt, jn dem namen des vater vnd des svns vnd des hailigen geistes, vnd dvrh ain offen gewizzen, vnd dvrh ain ewige bestaetichait. So haben wir geben dem vorgenanten hern Hadmaren von Svnnenberch disen prief ze ainem gezevge mit vnserm hangvnden jnsigil versigilt. Diser prief ist geben ze Wienne, do von Christes gebvrt waren ergangen tavsent drev hvndert jar, jn dem fivnften jare, darnah an sand Thomans tage.

Source Fulltext: BURGER, Urkunden Altenburg (=FRA II/21, 1865) S. 111-112