Ego Dittricus plebanus in Sitzendorf vniuersis, tam presentibus quam futuris, tenore duxi presencium intimandum, quod pro salute mea omniumque viuorum et mortuorum de bonis meis patrimonialibus et industrialibus, a bonis meis eclesiasticis fideliter segregatis, quatuor librarum redditus in duobus laneis in Zelderndorf situatis, a domino Wolfkango, castellano in Chunring tunc temporis, pro quinquaginta duabus libris denariorum Wiennensium comparaui, habito ad hoc consensu vnanimi et voluntate domine Elizabet, vxoris sue et omnium heredum, coheredumque suorum, quos presens negocium tangere videbatur, donans predictos redditus cum omnibus suis pertinenciis ad officinam infirmarie in Altenburch, vt ex hiis infirmorum fratribus (sic) et debilium, cum opus fuerit succurratur, piis ibidem deo deuote famulancium oxcitatus (sic), decernens et statuens firmiter obseruari, quod illarum possessionum prouentus pro nulla alia causa vel occasione aliquatenus expendantur, nisi ad eum vsum, ad quem eos vt premittitur deputaui, ad indigenciam videlicet infirmorum. In cuius rei testimonium presentes littere sunt confecte, sigillorum reuerendi dominj Siffridi abbatis in Altenburch et conuentus ipsius, meique munimine roborate. Vt autem maiorem vigorem per diutina tempora sortiatur, testes duximus subnotarj. Testes sunt: reuerendus dominus Sifridus abbas monasterij supradicti, dominus Albertus prior, dominus Walchunus senior, dominus Nycolaus cellerarius, sacerdotes; jtem dominus plebanus Otto de Wldeinstorf, dominus Alramus de Espesdorf, et alij quam plures homines fide dignj. Datum et actum anno dominj millesimo trecentesimo nono, III. Nonas Maij.

Source Fulltext: BURGER, Urkunden Altenburg (=FRA II/21, 1865) S. 121-122