Ich Ortneit von Sweinwart vnd ich Dimvt sein havsvrowe, wir veriehen vnd tvn chvnt allen den, die disen prief lesent oder horent lesen, di nv leben vnd hernah chvnftich sint, daz wir mit vnser erben gvtem willen vnd gvnst, mit verdahtem mvte, vnd mit gesamter hant, zv der zeit do wir iz wol getvn mohten, verchavft haben vnsers rehten aigens ain halp phvnt Wienner phenninge geltes, daz da leit ze Straenich avf ainem halben lehen, daz vns mit fvrziht vnd mit loz ze rehtem erbtail angevallen ist. Daz vorgenant halp phvnt geltes haben wir geben mit allem dem nvtz vnd reht, als iz vnser vodern vnd wir in aigens gewer herpraht haben, vmb zwelif phvnt Wienner phenninge, der wir reht vnd redlichen gewert sein, dem erbern manne Fridrichen dem Hevzzen vnd seiner havsvrowen vron Margreten vnd allen irn erben, ledichlichen vnd vreilichen ze haben vnd allen irn frvmen damit ze schaffen, verchavffen, versetzzen vnd geben, swem sie wellen an allen irresal. Vnd darvber dvrh pezzer sicherhait so setzzen wir vns, ich Ortneit von Sweinwart vnd Dimvt sein havsvrowe, vnd ich Vlrich, vnd ich Vlrich die prvder vnd die Spaen genant von Gadem, vnverschaidenlichen Fridrichen dem Hevzzen vnd seiner havsvrowen vron Margreten, vnd allen irn erben vber daz vorgesprochen halp phvnt geltes da ze Straenich ze rehtem scherm fvr alle ansprahe, als aigens reht ist vnd des landes reht ze Osterreiche. Vnd geben in darvber disen prief zv ainen sihtigen vrchvnde vnd zv ainem offen gezevge vnd zv ainer ewigen vestnvnge diser sache, versigilten mit vnsern jnsigiln. Vnd sint avch des gezevg: her Wernhart von Rotenvelz, her Wernher der Hevzze, her Hainrich von Streitwesen, Dietrich von Valchenstain, Vlrich der Lonholz, vnd ander frvme levte genvch, den dise sache wol chvnt ist. Diser prief ist geben, ze (sic) do von Christes gebvrt waren ergangen drevzehen hvndert jar, jn dem ainleften jare, darnah des Erihtages jn der Phingistwochen.

Source Fulltext: BURGER, Urkunden Altenburg (=FRA II/21, 1865) S. 124