Ich Alram von Perg vergich vnd tuen chunt allen den, di disen prief sechent lesen oder horent lesen, die nu sint oder hernach chunftich verdent, daz ich mit zeitigem rat meiner vrevnt vnd mit gueter gvnst meiner havsvrovn ver Katrein, vnd allur (sic) meiner gerwen, Fridreichs, Hainreichs, Elspeten, Katrein, Margreten, Petersen, dem edeln ewern herren, hern Hadmarn dem Sunnwerger ze Asparn zu seiner stiftung, dem spital ze Altenbu^erch, subenzechent halwen schillinch phennench geltes verchauft hawen vm ais mi dreich (sic) phunt Wienner phenneng, der ich erleichen vnd schon gewert pin. Der vadern gult ligent datz Radwanstorf auf zwain lechen nevnthalb schillinch vnd ain phennench, datz Nevnpauch auf ainem lechen funf schilling vnd zwelif phenneng, datz Sitzendorf auf einer hofstat vnd auf ainem acher echt vnd suwintz phenneng. Vnd durch pezzerr sicherhait will, wil ich vargenanter Alram mitsamt meinem geswein Engelprechten dem Gruewer ze Chrueg vnd mit Gotschalhen von Vronhouen des vargenanten guetes sein rechter scherm nach aigens recht vnd nach lantes gewonhait, als lang vntz daz sich meinev chint vermugen, daz si gwer vnd scherm der vargenanten gült pehalten mugen. Vnd daz diser chauf stet vnd vnzeprochen weleib, des gib ich im disen prief ze einer verchunt, versigelten mit mein hern Haidenreichs jnsigel purgrauen ze Gors, vnd mit Engelprechtes jnsigel vnd mit meinem jnsigel. Diser schache sint zevg: hern Haidenreich purcraf ze Gors, her Ott der Weidener, Ott sein sun, Ot der Mertz, Artolf der Mertz, Herwort der Molter, Gotschalich van Vronhouen, Reinwot sein prueder, vnd ander vrum leut genueg. Der prief wart gegewen nach Christes gepu^ert vber drevtzechen hundert jar, darnach in dem zweliften jar, des ersten Suntages in der Vasten.

Source Fulltext: BURGER, Urkunden Altenburg (=FRA II/21, 1865) S. 127-128