Wier Perchtold graf von Hardekke, graf Purchardes su^en von Maidwurch, ueriehen vnd tuen chunt allen den, die disen brief ansehent vnd horent lesen, die nv lewent vnd hernach chunftich sint, daz mit vnserem gu^etlichem willen ein weingart auf vnserm aîgen daetz Pulka in der nidern holtzpeunt, der vns dienet funfzehen phennige Wienner mu^onizze, an dem tag vnd man den selben weingarten list ze purchreht, durch eines totslages willen, ze pezerung der sel vnd den vrêunten zv vnser vrawen goteshaus ze Ragtz gechauft ist vmb vierzehenthalbe pfunt phennige Wienner mu^enizze, also peschaidenlich, daz man alle wochen des Phintztages in sand Jacobs chyrchen in dem marchte ein mêsse sprechen sol uon der phârre. Vnd ob daz wer, daz ein pharrer oder sein verweser dazt der vorgenanten chyrhen daz nicht tuen wolt vnd die vorgenanten mêsse liezze abgen, daz die pesten vnd die aeltisten des gedigens in der Ragtzgegent vnd auch die aeltisten purger ze Rogtz iehen, iz wer der gotsdienst ze lange lazzen in der vorgenanten chyrhen sande Jacobs, so sol sich danne Johans von Neteinsdorf vnd sein erben vnd sein vreunt, vnd Merbot der Widersperger vnd sein erben vnd sein vreunt, des vorgenanten weingarten mit vnserm willen vnd mit vnserre helfe vnd vnserre erben vnderwinten, vnd schnellen den geben auf ein ander gotshaus, do man den gotesdinst pege, got ze lob vnd der sel ze helfe. Vnd daz daz vnzebrochen peleib, hab wier vnsern brief mit vnserm jnsigel dorvber gegeben zv^e einem sichtigen v^orchunde vnd zve einer ste^aten sicherhait diser sache, des vorgenanten selgeretes. Diser red sint gezeug die hernach geschriben stênt: her Stepphan von Meyssaw^e, marschalch in Oesterreich, her Vlreich sein sûn der jung von Meyssawe, her Ulreich von Du^errenpach, sein bruder der Weichhart, der Pôppo von Liewenberch, sein bruder der Engelprecht, der Vlreich von Peygarten, der Leupolt der Spôn, der Otto der Zendel, her Ortlieb sein bruder, der Ernst von Schydînge, der Otto von Purchdorf, der Vlreich von Purchdorf, der Span von dem Wasen, Wetzel der Trezzedler, Albrecht der Geveller, Hainreich der Redler, Peter der Lydnitzer, Herman der Lidnitzer, Lvdwich von Lidnitz, Ulreich der Dachpêche, Vlreich der Gruennepech, vnd ander biderb leut genu^och, den disev sache wol chunt ist. Ditzze ist geschehen vnd ist der brief gegeben, du von Christes gepurde ergangen woren tausent jâr vnd dreuhundert jâr, in dem vierzehenten jar, an vnser vra^own tag der jungisten.

Source Fulltext: BURGER, Urkunden Altenburg (=FRA II/21, 1865) S. 135-136