Ich Rapot vnd ich Haidenreich, die purchkraven von Gors, tven chvnt allen den, die nv sint oder hernach chvnftich werdent, die disen prief lesent oder ansehent, daz vnser vodern vnd auch wier dem goteshovs datz Altenburch gegeben haben durh vnser sel willen vnd vnser vodern sel willen, daz guet, daz hernach an disem prief genant ist. Daz ist Ekenstain, vnd swaz da zve gehort, daz wier gechauft haben wider Fridrichen den Fuhse von Schraetental; datz Obern-Weiden zwai phunt geltes auf ainen hof, dev wir gechovfet haben wider Hainrichen den Dachpechen; dazz Prvnne vnd datz Buzendorf ain halb phunt geltes, daz wier auch gechauft haben wider den vor genanten Hainrichen den Dachpechen; datz Nidern-Weiden Liebharts hof, den wier gechauft haben wider hern Otten dem Weidenaer; datz Winchel nevn schilling phenning gelts, dev wir gechauft haben wider Hainrichen den Toplaer; datz Mvlveld zwen hof, ainen den wir gechauft haben wider Mertaenen den Polster, den andern, den wir gechauft haben wider Fridrichen den Zobel vnd Teynraten, vnd dient iglicher ainen mvtte chornes vnd ainen mvtte habern; datz Salarn ain phunt phenning geltes vnd ein wis, vnsers rehten aigens; datz dem Germans sehs schilling phenning geltes on fvmf phenning, vnsers rehten aigens; datz dem Praevnreichs ainlifthalben schillinch phenning geltes, vnsers rehten aigens; datz Graevenperg vnd datz Godweinsdorf ahtedhalb phvnt phenning geltes; datz Obern-Naelib vier phvnt phenning geltes vnd zwen vnd vierzich phenning, de wier gechauft haben wider Engelprehten dem Fuhs von Haselberch; datz Mittern-Retzpach vier phunt phenning geltes vnd vierzehen emmer wines perchrehtes, vnsers rehten aigens; datz Celderndorf ain phunt phenning geltes, daz wir gechauft haben wider Jansen den Basaer; daselben auch ain phunt phenning geltes, daz wier gechauft haben wider hern Dietmaren den Hadmarsdorfaer, vnd auch doselben ain phunt phenning geltes, daz wier gechauft haben wider Ortwaeinen den Tvmbratzaer; datz Straenich sehs schilling phenning geltes, dev wier gechauft haben wider Haertweigen den Wilpergaer; daselben vierzich phenning geltes, die wier gechauft haben wider Chvnraten von Praitenweidaech; daselben auch sibenzehen schilling phenning geltes, die wir gechauft haben wider hern Wolfkanch von Nevendorf vnd seinen svn Dietrichen; datz Wartperch drithalb phunt phenning geltes on dreiszich phenning, daz er ze lehen het von vns; vnd fumf vnd zwainzig phenning, die man dient von ainem weingarten, die wir auch gechauft haben wider hern Wolfkanch von Nevendorf vnd seinen svn Dietrichen; datz Altmansdorf drev phunt phenning geltes vnd fumf vnd zwainzig phenning vnsers rehten aigens; datz Lo^ech vierzehen emmer weines perchrehtes in dem Vohental, vnd vier vnd sehzich phenning geltes, die wier gechauft haben wider Pernger won Weidungsauwe vnd sein erben. Ditze vorgenant gvet, als wier e veriehen haben an disem prief, wier haben iz gechauft, oder iz sei vnser erb gewesen, hab wier gegeben dem vorgenanten goteshovs ze Altenburch vreylichen vnd ledichlichen, vnd des selben guetes scherem wellen sein nach aigens reht vnd des landes gewonhait hie ze Oesterich. Vnd dar-vber, daz si daz e genant guet dester vreylicher besytzen, welle wier, daz si vber daz selbe guet ainen vogt nemen, der in gevalle vnd in allernvtzist sei. Vnd daz die red vnd die sach staet vnd vnzeprochen beleib ewichleich, des geb wir dem vorgenanten goteshovs ze Altenburch disen prief, versigelt mit vnsern insigelen, vnd mit den zeugen die hernach genant sint. Daz ist her Hainrich von Cheyowe vnd sein prueder Chvnrat, her Hadmar von Raschenloech der Svnnbergaer vnd sein svn Hadmar, her Chraft von Sunnberch, Vlreich der Meyhsowaer, Seifrid der Plaenichaer, vnd ander erwaer laevt genueg, den disev sach chunt ist. Der prief wort gegeben nach Christas gepurt vber drevzehen hundert iar, darnach in dem vierzehent iar, an der lesten vnser vrowen tag.

Source Fulltext: BURGER, Urkunden Altenburg (=FRA II/21, 1865) S. 136-138