Ich Katrey, herrn Chraften witib van Sunnberch, dem got gnad, vnd ich Reimprecht der Tuerse, wir veriechen vnd tuen chund allen den, di nu lebent vnd hernach chunftich werdent, di den prief lesent oder horent lesen, daz der uorgnant herr her Chraft van Sunnberch den erbern geistlichen leuten vnd dem chloster zu Altenburch gegeben hat mit vnserm gueten willen, ze der zeit, do er iz wol getuen macht, leutterlich durich got, ze hilf vnd ze trost seiner sel vnd aller seiner vordern sel, seihs rechten aigens, ein holtz mitsampt dem grunt, daz er in selb auzgemercht vnd auzgezaigt hat, daz do leit gegen dem chloster, ze nest ierm holtze, daz do haizet di Hagleiten. Vnd dorvmb, daz di selben geistleichen leut datz Altenburch ewichleich got fuer vns piten, vnd in ir andacht ze aller zeit wesunderlich gedenchen, hab wir vns gegen in verpunden mit vnsern trewn, daz in vnd irem chloster zu Altenburch van vns nach van vnsern erben thain chrieg nach thain ansprach furbaz vmb daz selb holz schol aufersten, denn daz seu iz lediglich vnd vreilich haben schullen mit allem dem recht vnd nutz, als iz der vorgnant her Chraft van Sunnberch in rechter aygens gewer gehabt hat, vnd schullen auch allen iren frum damit schaffen an allen irresal. Wir veriechen auch, daz wir stet wellen haben vmb den werd, der do leit inderthalb der Neunmul, der auz dem mayrhof datz Stain in di selben mul verchauft vnd verpurchrecht ist, also daz di mulner in den mairhof van dem selben werd dienen schullen ze rechtem purchrecht vier Wyenner phenning alle iar an sand Jakobs tag, vnd schull auch wir di mulner an dem selben werd nichtes irren. Daz di red vnd di sach furbaz stet vnd vnzebrochen ewichlich weleib, gib ich uorgnante Katrey van Sunnberch vnd ich Reinprecht der Tuers dem chloster vnd der sampnung ze Altenburch den prief zu einem steten gezeug vnd zu ainer ewigen vestenung diser sach, versigelten mit vnsern paiden insigeln. Der prief ist geben zu Sunnberch, nach Christ puert vber dreutzechen hundert iar, darnach in dem viertzkisten iar, an sand Agnesen tag.

Source Fulltext: BURGER, Urkunden Altenburg (=FRA II/21, 1865) S. 201-202