Ich Hertl der Weyzzenpekch vnd ich Anna sein havsuraw, vnd all vnsre erben, vergechen offenleich an dem prief allen lewten, di in sechent, lesent oder horent lesen, di nu lebent vnd hernach chunftig sind, daz wir mit gutem willen, vnd mit wol wedachtem muet, vnd mit rat vnd gunst aller vnser erben, vnd zv der zeit da wir iz wol mit recht getun mochten, recht vnd redleich lewterleich durich got, vnd durich vnser vnd vnsern vodern selen hail willen, gegeben haben alle die gueter, di wir zu Vlreichslag gehabt haben, als di hernach geschrieben stent, vnd mit allem dem recht, als wir die ich vnd mein erben, in nutz vnd gewer inne gehabt haben, dem erburdigen geistleichen herren, di zeit abpt Seyfriden, vnd dem gantzen conuent des gotzhaws ze Altenburch, vnd allen iren nachchommen. Dez ersten sechtzig pfennig aygens geltes bestift vnd gelegen sind auf zwain lechen ze Vlreichslag, vnd di zeit aufgesezzen ist Hans der Plewsinger vnd Michel der Pfinchster von dem Gotzleins, von einem firtail eines hoffs drey pfennige vnbestifts, vnd Heinrich der Lewbler von ainem firtail dez selben hoffs drey pfenning, vnd Gorig der Leber von dem selben halben hoff sechs pfenning, vnd Gorig der Geueller ze Waidhofen von ainem zechent, der do leit auf dem Lenspach, vnd waz zu dem selben zechet gehört, fir pfenning geltes. Vnd di gult alle haben wir, ich vorgenanter Hertl der Weyzzenpech vnd all mein erben ledichleich gegeben dem obgenanten abpt Seyfrid vnd dem gotzhaws ze Altenburch, fürbaz allen iren frum damit schaffen, mit versetzen, vnd mit verchawfen, vnd geben wem sew wellen, an all irrung, vnd also beschaidenleich, daz si vnsern vorvadern vnd nachchomen sellen gedechnuzz schullen haben nach iren trewn. Daz di sach also ewichleich stete vnd vntzebrochen peleib, so gib ich vorgenanter Hertl der Weizzenpech für mich vnd für all mein erben dem egenanten abpt Seyfrid vnd dem gotzhaws ze Altenburch den prief, versigelten mit meinem anhangunden insigel, vnd ich gepeten hab ze zewg hern Renbarten den erbern ritter von dem Waltreych's, der sein anhangendes jnsigel daran gelet hat, im an schaden. Der prief ist geben nach Christus gepurd drewtzehen hundert jar, darnach in dem sechs vnd svbintzigestem jar, an sand Lucie tag der heyligen jvnchurawn.

Source Fulltext: BURGER, Urkunden Altenburg (=FRA II/21, 1865) S. 265-266