Nicolaus, dei et apostolice sedis gratia episcopus Ypponensis, reuerendissimi in Christo patris et domini domini Cristoffori eadem gratia episcopi Patauiensis jn pontificalibus cooperator, vniuersis et singulis presentes nostras litteras inspecturis lecturis visuris pariter et legi audituris salutem in eo, qui omnium vera salus est viuorum et mortuorum. Noueritis, quod anno domini millesimo quadringentesimo nonagesimo quarto die vero Jouis, que erat quartadecima mensis Augusti, posteriorem partem monasterij sancti Lamperti jn Altenburgk ordinis sancti Benedicti Patauiensis diocesis de speciali commissione et voluntate prefati domini nostri reverendissimi episcopi iuxta formam sancte matris ecclesie spiritus sancti gratia uobis suffragante rite et legittime diligencia ac deuocione qua potuimus duximus reconciliandam atque reconciliauimus. In prefata vero parte eodem die quatuor altaria, quorum primum jn honore sancte Anne matris Marie, secundum jn honore sancti Vdalrici confessoris a dextris, tercium vero jn honore sanctorum Wolfgangi et Kristoffori, quartum autem in honore omnium apostolorum a sinistris, in prefata ecclesia situatis de nouo pariter consecrauimus; dedicacionem vero dicti monasterij, que semper et hucusque antiquitus dominica secunda post festa pascalia videlicet "Misericordia domini" annuatim peragi consueuit, ad singularem peticionem et jnstanciam reverendi in Christo patris et domini domini Laurencij pro tunc abbatis predicti monasterij et conuentus ibidem et ex certis venerabilibus causis coram nobis allegatis maturaque deliberacione prehabita auctoritate qua fungimur jn hac parte transferendam duximus et transponendam, transferimusque et transponimus per presentes, statuentes jpsam ex nunc et jn autea per presentes dominica tercia post festa pascalia videlicet "Jubilate deo" etc. annuatim celebrari. Cupientes jgitur vt sepedictum monasterium cum altaribus eiusdem congruis frequentetur honoribus et a Christi fidelibus iugiter veneretur ac decenter muniatur, et vt Christi fideles ipsi eo libencius deuocionis causa confluant ad illud, quo jbidem celestis dono gratie vberius sese sonspexerint esse refectos nos de omnipotentis dei misericordia ac beatorum Petri et Pauli apostolorum eius auctoritate confisi omnibus et singulis vtriusque sexus Christi fidelibus vere penitentibus et confessis, qui dictum monasterium et altaria eiusdem jn nattiuitatis resurreccionis ascensionis domini nostri Jhesu Christi et penthecostes circumcisionis epiphanie trinitatis corporis Christi Viti martiris singulis gloriose virginis Marie omnium sanctorum omnium apostolorum necnon jpsius monasterij [reconciliacionis] et dedicacionis festiuitatibus deuote visitauerint, et ad reparacionem conseruacionem municionem augmentacionem eiusdem, necnon calicum librorum luminariumque ac aliorum ornamentorum pro diuino cultu jnibj necessariorum manus suas promptius porrexerint adiutrices, de quolibet festorum predictorum quadraginta dies criminalium et octoginta venialium peccatorum de iniunctis eis penitencijs misericorditer in domino relaxamus futuris perpetuis temporibus duraturis. In quorum fidem et testimonium presentes litteras fieri nostrique sigilli pontificalis iussimus et fecimus appensione communiri. Datum et actum anno die et loco prenotatis.

Source Fulltext: BURGER, Urkunden Altenburg (=FRA II/21, 1865) S. 358-359