Gregorius episcopus, servus servorum dei, dilectis filiis abbati de Gersten, preposito Sancti Floriani et decano de Anaso Pataviensis dyocesis salutem et apostolicam benedictionem. Dilectus filius abbas de Chotwico sua nobis petitione¹ monstravit, quod cum abbas Rotensis Frisigensis dyocesis ipsum super Swarza et quibusdam aliis villis, possessionibus et rebus aliis coram decano Salzpurgensi et suis coniudicibus auctoritate apostolica convenisset, quia dicti iudices ad locum non tutum citantes eundem aliumque sibi securum assignare contra iusticiam denegarunt humiliter requisiti, idem senciens indebite se gravari nostram audienciam appellavit. At ipsi legitima eius appellatione contempta partem alteram in possessionem rerum ipsarum pretermisso iuris ordine induxerunt. Ideoque discretioni vestre per apostolica scripta mandamus, quatenus, si ita est, revocato in statum debitum, quicquit post appellationem huiusmodi inveneritis temere attemptatum in causa ipsa, iuxta priorum continenciam litterarum appellatione remota ratione previa procedatis. Alioquin partes ad priorum iudicum remittatis examen, impetrantem in expensis legitimis condempnando. Testes autem, qui fuerint nominati, si se gratia, odio vel timore subtraxerint, per censuram ecclesiasticam appellatione cessante cogatis veritati testimonium perhibere. Quod si non omnes hiis exequendis poteritis interesse, duo vestrum ea nihilominus exequantur. Datum Perusii VII. idus decembris, pontificatus nostri anno VIII.

Source Fulltext: FUCHS, Göttweig I (=FRA II/51, Wien 1901) S. 119-120