Alma mater ecclesia suis cupiens profectibus ampliari relictis terrenis cultibus ad celestia semper intendens spiritualibus super celestibus et eorum cultibus nititur inherere. Ideo eadem pensione pensata nos Otto divina providencia abbas monasterii Chotwicensis ordinis sancti Benedicti Pataviensis dyocesis omnibus posteris nostris per presentes innotescimus et publice protestamur, quod ex nostra mera et libera voluntate ac sincera devotione ob cultum dei augmentandum ad honorem dei omnipotentis et virginis Marie matris eius et sanctorum omnium specialiter sancti Benedicti patris ordinis nostri et beati Altmanni fundatoris nostri infrascripta bona extra administrationem et bona monasterii percepta per nos alias addonata et percepta damus liberaliter capelle sancti Benedicti per nos constructe et per reverendum in Christo patrem, dominum Albertum^a Pataviensem episcopum eodem domino abbate procurante consecrate, que quidem bona census seu redditus sunt hii: primo curiam in Hugling¹ emptam a Velchlino iudeo, que servit unum modium tritici, duos modios frumenti, unum modium ordei, duos modios avene, XII magnos caseos, quatuor aucas, octo pullos, XI solidos denariorum Mychahelis; item in v^erspring² unum beneficium emptum a Leutwino camerario in Ekkendorf,³ quod servit X solidos Mychahelis, unum porcum valentem talentum, XII caseos magnos, duas aucas, VIII pullos; item ibidem ex novo trium talentorum redditus preter XXX denarios, qui iure civili hoc modo porriguntur: Mychahelis duo talenta, item XVIII caseos plusquam mediocres, XI pullos; item in Chueffarn⁴ unum weinzurlgeriht emptum a^b dicto Span, quod servit Mychahelis XII solidos denariorum; ibidem de una area XV denarii; item in Maizbirbem XIIII solidi reddituum a Valwahario; item in Chunesteten⁵ dimidii talenti redditus a Pappenhaimario; item vineam in Neunburga dictam Velegraben⁶ emptam a Leutwino camerario in Ekkendorf. Qua quidem oblatione sincera mente pura et devota dicte capelle facta volumus, ut ipse, qui oblagiam in dicto monasterio nostro tenet in posterum et tenebit dictos redditus atque bona per nos donata manu amplectetur, teneat et possideat ac singulis diebus faciat in una missa eedem capelle deservire videlicet eo modo, ut quatuor misse de sancto Benedicto dicantur, tres vero celebrentur in memoriam fidelium defunctorum. Ipse vero, qui oblagiam tenuerit, de perceptis redditibus domino fratri, qui eodem die missam inibi habuerit, tenebitur in VII^c Wiennensibus providere.^d Quod si ipse, qui ipsam oblagiam et predicta bona possidebit et habebit, predictam missam non tenebit nec observabit, tociens unam libram Wiennensem ad cameram ipsius abbatis, qui pro tunc fuerit, applicabit et quociens infringitur, tociens penam predictam accomitabit seu accumulando persolvet. Et nichilominus ipse commissarius seu dispensator oblagie in anno et die obitus nostri ad honorem dei et omnium sanctorum eius et in memoriam omnium abbatum predecessorum nostrorum et eorum, qui nos subsecuntur, vigilias consuetas et officium pro defunctis in dicta capella peragere tenebitur sub pena premissa necnon quilibet fratrum in anniversario nostro duas missas pro defunctis legere teneatur. At ipse oblagiam tenens fratribus de conventu pictanciam et consolationem iuxta ipsius ordinis observatam consuetudinem ac reddituum facultatem tenebitur elargiri. In cuius rei testimonium et amplitudinem veritatis in posterum observandam damus hanc nostram literam predicto nostro monasterio et predicte capelle per nos fundate in donationem et dotationem et volumus, ut et posteri nostri predicta observent, sigillatim sigillo reverendi in Christo patris et domini nostri, domini Alberti venerabilis episcopi Pataviensis, conventus nostri predicti atque nostro. Áctum et datum in dicto nostro monasterio anno millesimo CCC tricesimo quinto II. idus ianuarii.

Source Fulltext: FUCHS, Göttweig I (=FRA II/51, Wien 1901) S. 356-359