Albertus dei gratia Pataviensis episcopus ad notitiam presentium et memoriam futurorum. Ea que ad cultus divini augmentum proficiunt et per que Christi fidelibus ad frequentandum divinum officium maior commoditas adhibetur, merito sunt benigno favore promovenda et studioso desiderio adimplenda. Constitutus igitur in presentia nostra fidelis vir, dilectus Otto de Wald coram nobis proponit,^a quod ipse in cappella sancti Georii,¹ sita in castro suo Wald,² que hactenus a matrice ecclesia in Pirichaech singulis diebus dominicis et festivis ac duobus diebus in ebdomada vel tribus cum una missa inoffitiari^b est solita, cultum divinum ampliari desiderans ipsam de suis bonis propriis dotare adeo intendebat, quod deinceps proprio rectore gaudere posset, qui aput eandem resideret et in officio divino ibidem cottidie altissimo deserviret, petens, ut ad factum tam pium et devotum consensum nostrum benigne adhibere dignaremur. Nos vero laudabile propositum ipsius in domino commendantes, quia consideravimus prefate matrici ecclesie hoc magis prodesse quam obesse eo, quod ipsa ab onere inoffitiandi^b prefatam cappellam, ut premittitur, in posterum manebit supportata accedente quoque bona voluntate et consenssu^b venerabilium et religiosorum virorum Wulfingi abbatis monasterii Chotwicensis ordinis sancti Benedicti nostre dyocesis suique conventus, ad quos ius patronatus in ecclesia Pirichaech predicta noscitur pertinere, necnon discreti viri Nicolay^b eiusdem ecclesie plebani seu rectoris ea, que per eundem Ottonem circa premissa provida intentione facta et ordinata sunt, grata et rata habentes auctoritate ordinaria ex certa scientia confirmamus tali tamen adhibito moderamine, quod oblationes, que per sepedictum Ottonem et posteros suos ac familiam eorundem seu quoscunque alios in principalibus anni festivitatibus videlicet pasche penthecostes nativitatis Christi et omnibus sollempnitatibus beate Marie virginis, queve ab extraneis, qui de eiusdem Ottonis seu posterum^c suorum cottidiana familia non existunt, in dicta cappella, quocumque tempore aut die fiunt, plebano seu rectori dicte matricis ecclesie integre et sine diminutione qualibet perpetuo debebunt assignari. Rectorem vero cappelle prelibate Otto predictus et eius posteri per nos seu successores nostros canonice instituendum habebunt presentare, qui tamen de sacramentis ecclesiasticis ministrandis et quibuscunque iuribus parrochialibus exhibendis in nullo penitus intromittere se debebit, et ea omnia a matrici ecclesia predicta sunt petenda perpetuo et sumenda. In quorum omnium et singulorum testimonium et evidenciam perpetuam nostrum et prefatorum^d abbatis et conventus sigilla presentibus sunt appensa. Datum aput Sanctum Ypolitum anno domini millesimo CCC tricesimo quinto, vicesimo octavo die mensis martii.

Source Fulltext: FUCHS, Göttweig I (=FRA II/51, Wien 1901) S. 360-361