Ich Gerhart der Gneuz, Agnes mein housvrow, Hainri^ech mein alter sun und Gerhat mein iunger sun und alle unser erben veriehen und tun chunt alle, deu disen brief sehent lesent oder horent lesen, di nu lebent oder hernoch chumftig werdent, daz wir mit verdahtem mu^et und durch noetdurft und auch zu der zeit, do wi^er ez wol getu^en mahten, und mit gunst meines aydems Gotfrides des Redepruner und seiner housvrow^en Margreten und aller i^er erben noch rat unser besten vreunt haben verchauft reht und redleich unsers vreien aygen dreuzehen phunt geltz an ainsunsehtzik phenning rehter gult, daz gelegen ist in dem Vorst umb Oberndorf,¹ swi daz genant ist und als wir ez und unser erben in nutz und in gewer herpraht haben mit alle demselben nutz und mit alle dem reht und swo daz gelegen ist, als hinnoch geschriben stet, hab wir ez alles verchauft dem erbern gestlichen mann abt Wulfingen von dem Chotweig und sunderleich seiner erbern sampnung auf i^er oblay, di sunderleich der chauf angehoret, umb zwai hundert phunt und umb zehen schilling gemainer Wienner phenning mit leitchauf und mit allen sachen, der uns diselben herren auz irr oblay reht und redleich gewert habent. Und ist daz daz gu^et, daz wi^er in verchauft haben, in der Rinn² zwai lehen, der igleichs dient zehen schilling und zwelif phenning, auf dem Geirsperg³ ain lehen zehen schilling und zwelif phenning, ans Voglerhof⁴ vi^erzehen schilling und zwelif phenning, von Geiselhof⁵ achtzehen schilling an zwelif phenning, von Perhten lehen zehen Schilling und zwelif phenning, von Symons lehen siben Schilling an zwen phenning, von Chunrats lehen siben Schilling an drei phenning, von Pechleins hofstat segs und ein halphunt,^a von einer andern hostat^b zwelif und ein halphunt,^a von einer mule fumf schilling, von einem holtz dreizig phenning. Und denselben di^enst sol man in raichen an sand Mychelstag mit newen phenning. Daz vorgenant gu^et und auch die gult haben wi^er reht und redleich verchauft den herren ze Chotweig in i^er oblay und setzen auch uns und alle unser erben desselben guets scherm und gewêr, als aygens reht und landes gewanhait ist ze Ò^esterrich. Und swaz in doran abget, daz sullen seu haben auf alle deu und wi^er haben und gewinnen in dem lant ze Oesterrich. Und der chauf und auch di wandlung hinfuer ewichleich stet und unzebrochen beleib, geb wi^er dem vorgenanten abt Wulfingen und seiner sampnung ze Chotweig disen offen brief versigelt mit meim vorgenant Gerhartes insigel und meines alten suns Hainri^eches insigel und mit meines aydems Gotfrides insigel des Redeprunner. Der brief ist geben ze Chotweig, do man zalt von Christes geburd dreuzehen hundert iar und dornach in dem funf und dreizgisten iar des vreitags noch sand Margaretentag.

Source Fulltext: FUCHS, Göttweig I (=FRA II/51, Wien 1901) S. 361-363