Nos Gotfridus dei gratia ecclesie Pataviensis episcopus presentibus profitemur ad communem omnium noticiam deducentes, quod veniens ad nos venerabilis in Christo pater Wulfingus abbas monasterii Chotwicensis ordinis sancti Benedicti nostre dyocesis nobis exposuit, quod ipse curiam in Muetstal prope Rena cum omnibus iuribus et pertinenciis suis et in villa Neůndling unum laneum solvens viginti sex metretas tritici, quindecim metretas avene, septem solidos denariorum Wiennensium cum decem denariis, que omnia de propriis bonis per suam industriam acquisitis comparavit, conventui suo et fratribus de ipso conventu libere donavit tradidit et assignavit nullo prorsus iure dominii apud ipsum seu successores suos abbates aut eorum officiales in ipsis bonis permanente. Ipsi vero fratres sufficienti deliberacione perhabita decreverunt et statuto speciali super hoc cum solempnitate debita edito singuli propiis^a iuramentis firmaverunt, quod pro remedio salutis anime dicti abbatis unam missam perpetuam super aram,¹ que eis ad hoc deputata fuerit omni die celebrandam videlicet in ebdomada tres missas de sancta Scolastica et quatuor pro defunctis perpetuo observabunt et quod, quicunque oblagiarius fratrum predictorum pro tempore fuerit, presbytero predictam missam celebranti septem denarios Wiennenses de redditibus dicte curie in Muetstal debet ministrare, residuis fructibus eiusdem curie ad consilium seniorum fratrum tempore, quo provenerint, distribuendis decreverunt nichilominus anniversarium diem obitus dicti fratris Wulfingi abbatis, quando ab hac lute migraverit, cum solempnibus vigiliis et missa pro defunctis annis singulis peragere ceteris fratribus missas similiter pro defunctis legentibus in sequestro percepturi proinde de oblagiario predicto pietanciarum sive oblacionum nomine, quantum de supradictis redditibus in Neůndling tam in preatis^b denarii quam blado in denarios redacto cuilibet fratrum equali distribucione eodem die potent provenire, adicientes nichilominus statuto huiusmodi, quod quocienscumque novum abbatem in eodem monasterio creari contigerit, ille iuramento suo corporaliter prestito specialiter iurabit dictum statutum inviolabiliter observare et omnia in eo contenta firmiter adimplere. Verum si oblagiarius in distribucionibus predictis negligens fuerit vel rebellis, tunc in penam desidie sue tamdiu in aqua et pane ieiunando per priorem loci puniatur, donec eedem negligencie sine aliquo obstaculo emendentur. Si vero aliquis de conventualibus predictis unam missarum predictarum legere neglexerit, prout est pretactum,^c a percepcione denariorum distribuendorum de mandato dicti prioris tamdiu debet esse suspensus, quousque oblagiarius de parte sua in quadraginta novem denariorum Wiennensium plenarie satisfecerit sibi ipsi. Statuerunt insuper presentes literas in liberaria sua reponi et per oblagiarium, qui pro tempore fuerit, sub clausura propria fideliter observari. Sane quia premissa omnia ex laudabili intencione tam abbatis quam conventus predictorum cognovimus esse facta, nos ad devotam eorum instanciam ea auctoritate ordinaria ex certa sciencia confirmavimus harum testimonio literarum nostri ac prefatorum abbatis et conventus sigillorum appensione munitarum. Actum et datum anno domini MCCCXLV, dominica qua cantatur letare.

Source Fulltext: FUCHS, Göttweig I (=FRA II/51, Wien 1901) S. 410-412