Nos Vlricus dei gracia abbas, Fridericus prior totusque conventus monasterii Chotwicensis ordinis sancti Benedicti Pataviensis diocesis coram universis et singulis Christi fidelibus presencia cogrituris^a recognoscimus publice protestantes, quod venerabilis in Christo pater et dominus noster, dominus Vlricus dictus de To^etzenpekch, quondam abbas dicti nostri monasterii felicis memorie, sincere devocionis affectu in laudem et honorem almi creatoris et beate Marie semper virginis ac omnium sanctorum et electorum dei et ob salutem anime sue et suorum predecessorum ac successorum et omnium Christi fidelium defunctorum, ut divini cultus sollempnitas augeatur et dicti domini Vlrici abbatis ac suorum progenitorum commemoracio salubrius habeatur, in vita sua sanus mente et racione tempore, quo potuit, pia dotacione ad fundacionem missarum in dicto nostro monasterio perpetue celebrandarum prout infra: altari superiori super sepulcro sancti Altmanni, quod idem dominus Vlricus ex devocione speciali fecit construi et in honore omnium sanctorum consecrari, liberaliter contulit et donavit, omnia et singula bona sua propria tam denariorum quam bladi sita in Heerfu^ert,¹ que idem dominus emit a domino Symone Saxengangher milite et suis heredibus cum omnibus iuribus proprietatibus et pertinenciis ac fructibus, que spectabant et pertinent ad bona in Herfurt predicta, prout in literis empcionis super hoc conscriptis plane continetur, cui donacioni extunc consensimus et expresse presentibus consentimus volentes, quod quicunque fratrum nostrorum magister fuerit oblagie, predicta bona loco et tempore debitis et consuetis respiciat percipiat iure fundacionis capiat et conferat ac procuret et faciat omni die perpetuis temporibus unam missam per unum de nostris fratribus celebrari videlicet in dicto altari die dominico de omnibus sanctis, feria secunda pro defunctis fidelibus, feria tercia pro anima ipsius abbatis, feria quarta de assumpcione beate Marie virginis. feria quinta de corpore Christi, feria sexta de sancta cruce, sabbato missam de beata Maria generalem. Si autem fuerit festum apostolicum vel in septem luminibus, ex tunc nostre consuetudo regule debet in huiusmodi missarum celebracionibus observari. Preterea idem rector oblagie fratri missam celebranti pro misse cuiuslibet officio sex denarios Wiennenses benigniter ministrabit et si quid residuum fuerit, dabitur fratribus pro consolacione, ut eciam aniversarius magis devote peragatur. Ut autem dictarum missarum celebracio, ut premittitur, iugiter observatur,^b statuimus, ut si quis fratrum ad celebrandum missas huiusmodi deputatus missam neglexerit, quociens hoc fecerit, idem negligens ad arbitrium et artacionem domini prioris custodi ad sacristiam solvet mediam libram cere aut pauperibus in monte Chotwicensi tredecim denarios Wiennenses finaliter erogabit. Si vero fieret desolacio vel defectus in prefatis bonis ita, quod propter paupertatem colonorum dicte pecunie non possent ad ministrandum ut prefertur haberi, extunc a dictarum celebracione missarum erimus supportati, donec eadem bona in nostra potestate ad pristinam melioracionem fuerint reformata. Et pro testimoniali premissorum evidencia sigilla nostra presentibus sunt appensa. Datum in Chotwico anno domini millesimo trecentesimo LXX primo, feria sexta proxima post festum epiphanie.

Source Fulltext: FUCHS, Göttweig I (=FRA II/51, Wien 1901) S. 595-597