× Bonifatius × episcopus, servus servorum dei, universis Christi fidelibus presentes litteras inspecturis salutem et apostolicam benedictionem. Licet is, de cuius munere venit, ut sibi a suis fidelibus digne et laudabiliter serviatur, de abundantia sue pietatis, que merita supplicum excedit et vota bene servientibus sibi multo maiora retribuat, quem valeant promereri, nichilominus tamen desiderantes domino populum reddere acceptabilem et bonorum operum sectatorem fideles ipsos ad complacendum ei quasi quibusdam allectivis muneribus, indulgentiis videlicet et remissionibus invitamus, ut exinde reddantur divine gratie aptiores. Cupientes igitur, ut capella sancte Catherine in monte Chotwico Pataviensis diocesis congruis honoribus frequentetur et etiam conservetur et ut Christi fideles eo libentius causa devotionis confluant ad eandem et ad ipsius conservationem manus porrigant adiutrices, quo ex hoc ibidem dono celestis gratie uberius conspexerint se refectos, de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui in die eiusdem sancte capellam predictam devote visitaverint annuatim et ad conservationem huiusmodi manus porrexerint adiutrices, ut prefertur, duos annos et duas quadragenas de iniunctis eis penitentiis misericorditer relaxamus. Volumus autem, quod si alias visitantibus dictam capellam vel ad eius fabricam seu conservationem huiusmodi manus porrigentibus adiutrices aut alias inibi pias elemosinas erogantibus seu alias aliqua alia indulgentia imperpetuum vel ad certum tempus nondum elapsum duratura per nos concessa fuerit, huiusmodi presentes littere nullius existant roboris vel momenti. Datum Rome apud Sanctum Petrum XV. kalendas februarii, pontificatus nostri anno secundo.