× Bonifatius × episcopus, servus servorum dei, dilectis filiis . . abbati et conventui monasterii beate Marie in Gotwico ordinis sancti Benedicti Pataviensis diocesis salutem et apostolicam benedictionem. Exigit vestre devocionis sinceritas et religionis, sub qua devotum exhibetis domino famulatum, promeretur honestas, ut petitiones vestras illas presertim, per quas commodum et utilitas vestri monasterii procuratur, quantum cum deo possumus, ad exaudicionis gratiam favorabiliter admittamus. Hinc est, quod nos vestris in hac parte supplicacionibus inclinati et ut incumbentia vobis onera valeatis pro tempore commodius supportare de alicuius subventionis auxilio vobis providere volentes parrochialem ecclesiam sancte Petronelle de Sancta Petronella Pataviensis diocesis, que ut asseritur de iure patronatus vestri monasterii existit cuiusque viginta quinque dicto vestro monasterio, cuius trecentarum marcharum argenti puri fructus redditus et proventus secundum^a communem extimationem valorem annuum ut asseritur non excedunt, cum omnibus iuribus et pertinentiis suis auctoritate apostolica perpetuo incorporamus annectimus et unimus ita, quod cedente vel decedente dilecto filio . . rectore predicte ecclesie, qui nunc est, aut alias ipsam ecclesiam quomodohbef dimittente liceat vobis corporalem possessionem ipsius ecclesie propria auctoritate apprehendere ac etiam in usus vestros perpetuo retinere necnon fructus redditus et proventus ipsius ecclesie in supportationem eorundem onerum deputare super hoc diocesani loci pro tempore existentis et cuiuscunque alterius licencia seu consensu minime requisitis, reservata tamen de fructibus redditibus et proventibus ipsius ecclesie pro perpetuo vicario inibi perpetuo instituendo congrua portione, de qua congrue sustentari, episcopalia iura solvere et aha sibi incumbentia onera commode valeat supportare. Non obstantibus si aliqui super provisionibus sibi faciendis de huiusmodi vel aliis beneficiis ecclesiasticis in illis partibus speciales vel generales apostolice sedis vel legatorum eius litteras impetraverint, etiamsi per eas ad inhibitionem reservationem et decretum vel alias quomodolibet sit processum, quas quidem litteras et processus habitos per easdem ad predictam ecclesiam volumus non extendi, sed nullum per hoc eis quoad assecutionem beneficiorum aliorum preiudicium generari et quibuslibet litteris indulgentiis et privilegiis apostolicis generalibus vel specialibus, quorumcunque tenorum existant, per que presentibus non expressa vel totaliter non inserta effectus earum impediri valeat quomodolibet vel differri et de quibus quorumque totis tenoribus de verbo ad verbum haberi debeat in nostris litteris mentio specialis. Nos enim ex nunc irritum decernimus et inane, si secus super hiis a quoquam quavis auctoritate scienter vel ignoranter contigerit attemptari. Nulli ergo omnino hominum liceat hanc paginam nostre incorporationis annectionis unionis constitutionis et voluntatis infringere vel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursuruin. Datum Rome apud Sanctum Petrum XIIII. kalendas decembris, pontificatus nostri anno octavo.

Source Fulltext: FUCHS, Göttweig I (=FRA II/51, Wien 1901) S. 771-772