Bonifatius episcopus, servus servoram dei, dilecto filio Petro abbati monasterii sancte Marie in Gottwico ordinis sancti Benedicti, ecclesie Romane inmediate subiecti, Pataviensis diocesis salutem et apostolicam benedictionem. Cum nos nuper monasterio sancte Marie in Gottwico ordinis sancti Benedicti Pataviensis diocesis tunc vacanti de persona tua licet absente nobis et fratribus nostris ob tuorum exigenciam meritorum accepta de fratrum eorundem consilio duxerimus auctoritate apostolica providendum preficiendo te eidem monasterio in abbatem, prout in nostris inde confectis litteris plenius continetur, nos ad ea, que ad tue commoditatis augmentum cedere valeant, favorabiliter intendentes tuis supplicationibus inclinati tibi, ut a quocumque malueris katholico antistite graciam et communionem apostolice sedis habente, munus benedictionis recipere valeas ac eidem antistite, ut munus predictum auctoritate nostra inpendere libere tibi possit, plenam concedimus tenore presentium facultatem. Volumus autem, quod idem antistes, qui tibi prefatum munus impendet, postquam tibi illud^a impenderit, a te nostro et dicte ecclesie nomine fidelitatis debite solitum recipiat iuramentum iuxta formam, quam sub bulla nostra mittimus interclusam, ac formam iuramenti, quod te prestare contigerit, nobis de verbo ad verbum per tuas patentes litteras tuo sigillo signatas per proprium nunccium quantocius destinare procures. Datum Rome apud Sanctum Petrum XII. kalendas decembris, pontificatus nostri anno quarto decimo.

Source Fulltext: FUCHS, Göttweig I (=FRA II/52, Wien 1901) S. 27-28