Ich Hanns der Tollershaymer, ich Margret sein eeleiche hausfraw und ich Hanns des vorgenanten Hannsen Tollershaymer sun bechennen offenleich mit dem brief fu^er uns und all unser erben und tuen kund mênichleichen allen leuten gegenwu^ertigen und ku^enftigen, das uns der erwirdig geistleich herr, her Thaman abbt unser frawen goczhaus zu Gottweÿ und der gancz convent daselbs unser genêdig lieb herren iren und ires goczhaus hof zu Palt gelegen genant der Gusterhof und auch die mu^el dabey von besundern gnaden und trêwer dinst willen, so wir in und irem goczhaus erczaigt haben und auch hinfu^er tuen su^ellen und wellen, verlassen haben mit seiner zugeho^erung, als hernach geschriben stet: Item von erst mit anderhalb ieuch akcher in der Viechtrifft,¹ mit zwain ieucharten akcher zu Estricz,² mit ainem halben ieuchart akcher in der Czistel,³ mit ainem ieuch akcher und ainem dru^emlein ob der Czistel, mit drein ieuchen akcher genant der Gruebakcher, mit ainem ieuch akcher in Furterveld, mit zwain ieucharten akcher beÿ Furterweg, mit drin ieucharten akcher hinden bey dem hausgarten, mit anderhalben ieucharten akcher hinder des Hêsler haus, mit ainem halben ieuch akcher an Fuchawerweg, mit ainem ieuchart akcher beym Hochrain, mit drin ieuchen akcher an der Fuchaw, mit drithalben ieuch akcher zu Winkel,⁴ das Gruebêkchêrll mit ainem dru^emlein bey Prunn,⁵ mit ainem ieuch akcher genant der Liechtakcher, mit ainem halben ieuch akcher under Wagramersteig, mit zwain ieuchen weingêrten zu Vischof⁶ und mit anderhalben ieuchen weingarten oben auf der Mawrpewnt,⁷ auch mit drin tagwerchen wismad im Winkel und mit ainem tagwerich wismad hinderm Wolfsekch⁸ gelegen. Den vorgenanten hof die mu^el dabey und auch die obgeschriben êkcher weingêrten und auch all ander ir zugeho^erung mit allen den rechten eren und nu^eczen, als der vorgenant unser hof von alter herkomen ist, haben sy uns verlassen auf unser dreyer leib lebtêg und nicht lennger in solher beschaiden, das wir den obgenanten hof und mu^el mit êkchern weingêrten und wismad, als oben begriffen ist, ze dorf und veld pêwleich und stifftleich auf unser aygen gelt legen und halten su^ellen und in iêrleich davon raihen und geben zwainczig meczen waicz und zwainczig meczen korn an sand Mertentag und von der mu^el sunderbar ain mutt korn an sand Jorigentag alles zu anttwurtten in unsers goczhaus phisterhof und auch iêrleich von dem egenanten hof und êkchern vierczig meczen habern an sand Michelstag in iren chasten gen Go^ettwey. Wir su^ellen auch in und iren nachkomen iêrleich von allem wein, so aus den vorgeschriben weingêrten gepawet wird, zu der zeit, so die weinfru^echt im iar gefechsent werden, raihen und geben den dritten tail ungevêrleich, sein werd wenig oder vil, und daru^eber chainen zehent phlichtig sein ze geben. Wir su^ellen in auch aus unsern ho^elczern iêrleich fu^eern in die gustreÿ gen Go^ettwey zwelif fueder prennholcz, und daengegen haben sy uns auch geurlaubt iêrleich aus iren wêllden zwelif fueder prennholcz zu unserm nucz und frum und zymerholcz, alsvil und oft uns des zu paw des vorgenanten hofs und auch der mu^el ze nemen not geschiecht, und sein in dafu^er nichts phlichtig ze geben doch mit irem und irer nachkomen wissen. Und wann unser obgenant dreÿr leib ainer oder mer mit tod abgennt, so su^ellen und mu^egen dannoch die anderen oder ir ainer, der in leben ist, den vorgenanten hof und mu^el in aller mass innhaben und iêrleich davon raihen und geben, als oben beru^ert ist. Auch ist ze merkchen, ob wir unser ains oder mer den benanten iren hof mit seiner zugho^erung nicht stiftleich ze veld und dorf hielten, sunder im ain pew verczugen, dadurch er geergert wu^erd, wie das durch nachpawren und umbsessen erchant wu^erd, so mu^egen si sich des vorgenanten hofs mit seiner zugho^erung und auch der mu^el dabey wol wider underwinden, ee halt unser leib ainer oder mer mit tod abgennt an unser und mênikleichs von unsern wegen irrung und widerred ungevêrleich. Wann aber wir obgenant dreÿ leib mit tod abgangen sein, so ist in und iren nachkomen der vorgenant hof mit aller seiner zugho^erung und die mu^el dabey, wie sy ungevêrleich ze dorf und veld gefunden werden, widerumb ledig warden an unser erben und mênikleichs von iren wegen irrung und hindernu^ess ungevêrleich. Des zu urkund geben wir dem obgenanten erwirdigen geistreichen herren, hern Thaman abbt zu Go^ettwey und seÿnem convent unseren genêdigen lieben herren den brief fu^er uns und unser erben besiglt mit des edeln Hannsen des Tyemingêr, dieczeit richter des goczhaus zu Go^ettwey, anhangunden insigel, den wir vleissichleich darumb gepeten und uns mit unsern trewen darunder verpunden haben alles das war und stêt ze halten, so an dem brief geschriben stet doch im und seinen erben an schaden. Der sach ist auch geczêug durch unser vleissigen pet willen der edel Hanns der Pawmgartnêr mit seinen anhangunden insigel im auch und seinen erben an schaden. Geben nach Kristi gepu^erd vierczehenhundert iar und darnach in dem zway und vierczigkistem iar an sand Gregorgentag des heiligen lerêr.

Source Fulltext: FUCHS, Göttweig II (=FRA II/52, Wien 1901) S. 352-354