Ich Kathrei, Cristans des Wissinger burger zu Wienn hausfraw, bechenn für mich und anstat Margrethen, Hedweigen und Ludweigen meiner kinder, die noch nicht vogtper sind, dafur ich mich genczlich annŷm, und tun kund offenlich mit dem brief, das wir recht und redlich bestanden haben auf unser vir leib lebtêgen von dem erwirdigen geistlichen herren, hern Thomann abt des gotshaus zu Go^ettweig und dem convent gemain daselbs und im nachko^emen ainen weingarten, der zu dem benanten gotshaus geho^eret, gehaissen die Altenburgk, des zway jeuch sind, zenagst dem Weiprechten, burger zu Stain, gelegen in so^elher maynung, daz ich oder meine kinder, die der bestant nêmlich beru^ert, zu unsern lebtegen und nicht lenger den benanten geistlichen herren und irm gotzhaus zu Go^ettweig alle jar iêrlich von dem vorgenanten weingarten geben und raihen sullen den dritten emer most und den zehent besunderlich von unserm tail, uns werd darinn wenig oder vil. Wir sullen auch den benanten weingarten nicht lesen, wir tun das dann irm hofmaister in Go^ettweigerhof ze Stain oder wer in demselben hof gewaltig ist, ee ze wissen, der dann sein anwalt oder scheinpoten dabei haben soll. Auch sullen wir den maisch allen an ir mu^e und schaden pringen und antwurten in irn hof zu Stain in die press und da aus dem grant mit in tailn angever. Wir sullen auch den vorgenanten weingarten pêulich innhaben mit gutem mitternpaw, als weingartpaus recht ist, und alle jar darinpringen in ain jeuch zway tausent stekchen und zwelf fuder mist und in yeglich jeuch alle jar gruben funfczehen tagwerch. Wêr aber, das wir es in ainem jar versawmbten von welherlaÿ sachen das geschêch, so sullen wir es in dem andern jar gancz und gar erstatten, was wir in dem paw und arbait versawmbt haben. Teten wir des nicht, so habent sy oder ir anwalt vollen gewalt und recht uns mit unserm tail mosts in der press ze no^etten und pfenden, solang und alsverr das wir erstatten und widerlegen, was wir an dem weingarten mit arbait versawmbt haben, und ob wir solh sawmung ŷnner jarsfrist nicht erstattêten, sunder darinn sêwmig wern, so mu^egent sy sich des weingartens, ee halt die vier leib oder unser ainer mit tod abget, wol wider underwinden und verrer verlassen an unser und mêniglichs von unsern wegen irrung und hindernu^ess ungeverlich. Und ob ich obgenante Kathreÿ ee mit tod abging, dann die benanten meine kinder, so sol den weingarten albeg das eltist kind nach laut des briefs innhaben. Wir mu^egen auch unsere recht an dem obgenanten||
weingarten mit irm wissen und gunst zu unser vir leib lebtêgen wol verchumern doch also, das der obgenant weingarten nicht geergert werd. Und wenn der leczst leib mit tod abgeet, ist denn der obgenant weingarten desselben jars nach invessung der fru^echt mit arbait nicht beru^ert, so ist er dem vorgenanten gotshaus gancz und gar wider ledig worden an aller unser erben und menigclichs von unsern wegen irrung und widerred ungevêrlich. Wêr er aber mit arbait beru^ert, so sullen die nagsten erben die arbait volfurn und in das jar garaus innhaben in obgeschribner mass, und ist dann darnach aber widerumb ledig worden an unser und mênigclichs von unsern wegen irrung und widerred, als yecz beru^ert ist. Und des zu urchund gib ich fu^er mich und die egenanten meine kinder, dafu^er ich mich hab angenomen, den obgenanten geistlichen herren den brief versigelten mit des obgenanten meins lieben manns Cristans des Wissinger insigl, der das fu^er mich und meine kinder durch meiner pet willen an den brief gehenget hat, darunder ich mich und meine kinder vorgemelt mit mein trewn verpind alles das stet zu halten, das an dem brief geschriben stet. Der sach ist geczeug durch meiner vleissigen pet willen der erber Vlreich Hirssawer statschreiber zu Wienn mit seinem anhangundem insigl im und sein erben an schaden. Geben an sand Jo^ergentag nach Cristi gepurd virczehenhundert jar und darnach in dem zwaÿundvirczigistem jare.

Source Fulltext: FUCHS, Göttweig II (=FRA II/52, Wien 1901) S. 354-356