Vermerkcht, das fraw Susanna, Conrats des Plankchen von Scheibs tochter und ietz Walthasarn des Schifer zu Mauttarnn eleich hausfraw, hat mit handen des erwirdigen geistleichen herren, hern Wolfgangs abbt zu Go^etweig vermacht dem egenanten irem man Walthasaren Schifer die mu^ell gelegen aufmAigen underm Go^etbeig mit irer zughorung, davon man dint demselben gotshaus zu gruntdinst an sand Mertentag XL d. in die abteÿ und 1 mut korn in die phister. Sŷ hat im auch vermacht ain behausts lehen gelegen zu Pawngarten mit seiner zughorung, davon man dient in die abteÿ gen Go^etbeig an sand Michelstag XX d., an sand Margretentag XII d., XX meczen vogthabern an das wasser¹ und sechs phening darauf. Die obgenant mu^ell aufm Aÿgen und das behaust lehen zu Pawngarten mit iren zughorungen hat sŷ irem benanten mann vermacht in so^elher maÿnung, das er die mu^el und lehen sol haben nach irem abgang zu ledigem freim guet allen seinen frumm damit ze schaffen mit verseczen verkauffen und damit handeln, wie in verlusst, nach laut und inhaltung ains besiglten gevertigten gma^echtbrief, so er von ir darumb hat. Actum in anno domini etc. XLIX am festum pasce. 

Original dating clause: am festum pasce

Language: Deutsch

Notes: