Wir Fridreich etc. unserem lieben getrewen Jorigen von Kunring, unserm lanndtmarschalh in Osterreich, etc. Wir lassen dich wissen, das unser getreuer Walthesar Oder dem ersamen geistlichen, unserm liebn andechtigen . . dem abbt zum Gott(weig) unserm rat wider lanndesrecht entsagt, in und seins goczhaus leut in hangunden ladungen und rechten angriffen und beschedigt, auch ir etlich gefangen hat, darumb wir im in ungueten nichts mit in ze schaffen haben und die gefangen ledig ze lassen geschriben und têg her fur uns geseczt und ob im darzue glaits not sein wurde, das ze geben erboten haben sŷ zu baiderseit umb ir zwitrecht zu verhoren und versuechen gu^etlich zu verainen oder nach ainem pillichem zu entschaiden, daruber er sy noch weitter beschedigt und solh unser schreiben veracht. Emphelhen wir dir ernstlich, das du dem gemelten abbt und seinen leutten als lanndtmarschalh und vogt etlicher leut zu demselbn gotzhaus gehorennd mit deinen dienern und leutten per omnia, ut continet commissio cesarea pro domino de Maidburg, ut advocatis factis.

Source Fulltext: FUCHS, Göttweig II (=FRA II/52, Wien 1901) S. 525-526