Hochwirdiger etc.! Wisset zuvor, als ir mitsambt andern landtlewten, so ÿetz zw Haderstorf gewesen sein, mir am jungsten zugeschriben habt und gelaydt zugesant mich zw ew ze fuegen, des aber nicht beschehen sey. Auch von der zwitrecht¹ herrn Steffan von Eytzing und mein seÿ ew nicht lieb etc. Nw hab ich nye verstanden, das ir ew von hern Steffan und mein wegen gein Haderstorf pracht habt, und hab ew zugeschriben, das ich des von mercklicher meiner nottu^erft nicht thun hab noch ersuchen mugen, doch so hab ich ew gerechtikait und herrn Steffan Eytzinger handlung zugeschickt, ew gepeten dy zu horn innhalt meines schreibens darumben ausgangen und uber solchs vermaint ir, ich sull solhen krieg nachlassen und ob ich icht spruch zu dem bemelten Eytzinger vermain ze haben, so erpewt er sich furkomens und rechtens und benent mir doch kain richter, vor dem ich gegen im zu recht sten sol, und ob ich solhs von im nicht aufnam, wer solher krieg wer, von mir und den mein nicht zu gedulden noch ze leyden etc. Nw lasz ich ew wissen, das ich mich gegen dem bemelten Eytzinger zw eer und zu recht erpotten hab fu^er unserm allergenedigisten herrn, dem Romischen kaiser etc. umb mein zuspruch mich vor seinen kayserlichen genaden rechtens von im wol benuegen zu lassen. Desgeleichen wil ich im daselbs wider rechtens sein nicht danne gesetzt dan nach meiner absag nam und tat, das er aber veracht hat, als ir das an meinem erpieten und schreyben, so ich ew zugeschickt hab, wol vernomen habt, und main, das ir mich mit ewren schreiben uber mein erpieten unpillichen von seinem richter meinem hern und landesfursten weÿtter ziecht und dringen welt. Wan hiet ir icht von des Eytzinger oder||
meines kriegs wegen zw mir ze sprechen, so erpewt ich mich auch gegen ew fu^er unsern allergenedigisten herrn dem kaiser etc., des diener ich pin, daselbs wil ich ew stil halten umb er und recht, umb was ir zw mir ze sprechen habt. Wiert aber solhs durch ew von mir nicht aufgenomen, so sult ir wissen, das ich unrechtens von ew ÿe gern vertragen war, und pitt ewr verschribene antwiert beÿ dem potten wider zw wissen, wes ich mich auf ewer schreÿben und mein erpietten hallten sull. Datum Hawgstorf an pfintztag vor dem sunntag letare in der vassten anno domini etc. LXIIII.||
Wilhalm Lewprechtinger zw Hawgstorf.

Source Fulltext: FUCHS, Göttweig II (=FRA II/52, Wien 1901) S. 569-570