Edler besunder lieber herr! etc. Als etleich der ew^ern von euren wegen unsers gottzhaus getraid und ander zechent allenthalben umb Enczesdorff auf der Vischa¹ die vergangen jar mit und ausserhalbm bestannds gevechsent und gefurt haben und uns darumb hinczher chaynerlaÿ beczallung beschechen ist, als wi^er dan dasselbs mit mer wartten mit ew geret haben, darauf ir diczmallen antburt ta^et: ew wer darumb nicht wissen, ir wolt ew der sachen halben bei den ewr^en erkunden. Auf solhs witten wi^er ew in besunderem andachtigen vleis, ob ir von den edeln . . Floitten, . . des Velsloss gelassen witib, . . dem Czeilacher oder anderen iren vordern enen, phlegern daselbs zu Enczesdorff eurer und derselben dŷener, dye dan dye bemelten zehnnt etwevil vergangen jar, als uns anlangt, gefu^ert und gevechsent haben, in den obberu^ertten sachen erindert werd oder von den oder anderen den ewren des noch underricht wurd, als dan durch unsers gotzhaus unuberwinthleich scha^eden in den kriegjar^en enphangen und meniger anligunder notdu^erfftichait sunderleich der pillichkait wegen guttichleich darob und gedacht ze sein, damit wi^er solher und ander ausstennder gevechsentter zehent an verer vercziehen mit traydt beczalt oder uns in gelt vollig benu^egen darumb getan werden, und was euch der gegenburttig unser conventbruder in dem oder anderen weitter unser mainung sagen wirdet, im das diczmal gancz als uns selben gelaubet. Das etc. Geben zu Gott(weig) anno etc. LXIIII, dominica post Bartholomei apostoli. Mert von gottz gnaden abbt zu Gott(weig). Adresse: Dem edeln herrn, herrn Jorgen von Potendorff, obristen schench in Osterreich etc.

Source Fulltext: FUCHS, Göttweig II (=FRA II/52, Wien 1901) S. 605-606