Edler besunder lieber her! etc. Uns hat unser allergnedigister her, der Romisch kaiser ytzo geschriben und ew die lanndsteur von unsern leutten auf den nagstkunfftigen montag (März 11) ze geben bevolhen. Nun haben wir sein g. menigmal auch an den nagsten in der Neunstat unsers gotzhaus enpfangen schaden und anligund notturfft auch dabey anbracht, wie des gotzhaus leut hie und enhalb der Tunaw ausserhalb der umb den perg Gott(weig) wonhafft, die dan in gantzem verderben und armuet sein, all gevogt und von den vo^egten ettleich nagst vergangen iar hintzher darzue gebraucht und gehalden sein, das sy in und nicht uns zu raiss und steur gehorsam gwesen sein und die geraicht haben, darauf sy dan ytzo die lanndsteur denselben unsern leutten auch angeslagen und die von in lediklich auserhalb unser ingenomen haben, als ir dan solchs am nagsten auch von uns zu Wienn vernomen habt. Darumb bitten wir ew in besundrem andechtigem vleis in solch irrung der vogt ze sehen und das die vogt, der wir sein k. g. in geschrifft geantwurt haben, solch lanndsteur ausserhalb unser unsern leutten angeslagen und die von denselben zu iren hannden enpfangen auf sein k. g. aigenklich ze bringen. Wan wir das auch hiemit tun wellen und darauf geratten und verholfen ze sein, das wir solcher oberuerten vodrung der lanndsteur halben noch gnedikleich darauf begeben und die von den vogten, so die ingenomen haben, nach seiner k. g. gevallen ersuecht werden. Das etc. Geben zu Go^ettweig am sambstag vor reminiscere anno domini etc. im LXV. Mert von gots gnaden abbt zw Gottweig. Adresse: Dem edlen heren, hern Jorigen von Voklennsdorff,^a etc.

Source Fulltext: FUCHS, Göttweig II (=FRA II/52, Wien 1901) S. 644-645