Reverendo etc. Laurencio abbati monasterii Gottbicensis ordinis sancti Benedicti Pataviensis diocesis, amico nostro singulari Iohannes dei gracia episcopus Tridentinus. Reverende in Christo pater! etc. Recepimus scripta p. vestre unacum historia sive legenda beati Altmanni Pataviensis quondam episcopi ac fundatoris monasterii vestri nobis certe periocunda atque gratissima multas gracias habentes eidem, que se adeo pronam et benivolam in ea re a nobis petita exhibuit, ex qua cognovimus non illum hunc fuisse episcopum, quem arbitrabamur olim hic primum ac deinde ad ecclesiam Pataviensem translatum. Attamen carum et gratum nobis fuit intellexisse eius vitam et merita gloriosa merito apud deum et ecclesiam attollenda. Nonnulla tamen in eadem inserta de Gotis, Bauaris et Noricis ac montis illius et nominis interpretacione¹ aliorum scriptorum ac historicorum minime¹ consona videntur, de quo alias, cum tempus affuerit, vestre p. nonnihil scribendum putamus. Verumtamen tanta huius beati presulis et loci visendi voluntas ex huius leccione historie intercessit, ut si que illas partes accedendi facultas daretur, omnino eundem montem ac tumulum beati presulis invisere et visitare paternitatem vestram vellemus. Historiam autem Iornandis, quam nobis offertis si placeat copiendam, iam ante annos duodecim vel circa Wienne copiari fecimus, sed illam in plerisque locis truncatam et defectuosam reperimus, quam si alicubi locorum Austrie similiter descriptam reperiretis, vellemus, ut illam vestram cum eadem collacionari faceretis ac defectus illos suppleri et nobis communicari. Remittimus autem vestre p. cum presentibus historiam passionis et martirii huius nostri novelli innocentis pueruli beati Symonis² a quodam egregio phisico nostro descriptam unacum primis miraculis divina pietate ad tumulum eiusdem ostensis ac circa diversas infirmates occursis, quam illic apud vos inter devotas ac religiosas personas divulgari ac exemplari faciatis ad laudem dei et huius beati novelli innocentis martiris necnon fidei katholice exaltacionem et perfidie^a iudaice confusionem et si quid aliud pro vestra p. possimus, ecce nos paratissimi, cuius oracionibus ac fratrum nos plurimum commendamus. Valete in Christo. Datum Tridenti in Castro nostro Boniconsilii die octava mensis marcii anno etc. LXXVI.

Source Fulltext: FUCHS, Göttweig III (=FRA II/55, Wien 1902) S. 92-93