Ich Jorig von Potenndorf, obrister schennkh in Osterreich, ich Hainrich von Puechaim, erbdruksa^etz in Osterreich, und ich Wilhalm von Paw^emkirchn, freyherr zum Slêning,¹ bekennen aintrêchticlich fur unns und unnser erbn, daz wir wolbeda^echtlich ain freundtlich furnemen und verainigung der besetzung halbn genannt zu Eberstorff auf der Tu^enaw ennhalb und herdiszhalb auf dem lanndte, so wir zu innemen ains aufschlags gepaw^eet, mit einannder veraint und beslossn habn solher gestalt und forme, das wir denselbn aufschlag mit innemen und ausgeben ebengleich des gelts innhaben sulln und welln, darin dann kain tail gegen dem anndern kainerlaÿ geva^er nach vartail praw^echn oder suchn sol. Wir habn unns auch beÿ unnsern eren und trewn mit einannder verlubt und verluben uns auch aintrechtigclich in krafft ditz unnsers briefs, ob unns solh unnser furnemen des aufschlags halbn mit gewaldt widerstand oder in annder weg hindernuss beschêch oder uns davon dringn wolt, so sulln und welln wir ainer dem anndern mit seinem leib und guet trewlichen hilf und beistannd thun, soverr ein ÿeder seins leibs unnd guets vermag, und ob sich einigerlaÿ zwitrêcht oder irrung an dem obbemeltn besetzungn und aufschlag kainen tail kain schaden bringn sunnder ÿedm tail unvergriffnnlich seiner gerechtikhait bey obbestŷmbter ordnung peleibn und soln dŷ andern oder der ain dieselb zwitrêcht und irrung gewaldt haben ganntz hinzulegen und guetlichen zu verainen an all widerred wêgrung und aufzug. Ob aber derselb gewaldthaber solhe zwitrêcht zu verainen sich allain nicht annemen wolt, so sol und mag er alsdann den gewaldt haben noch ain oder mer zu im zu nemen, wer im darzu^e gevelt und tewglich bedunkcht und die sachn der zwitrecht halb entlichen hinlegen und verainen, wie vorgemelt ist, sol auch darinnen trewn vleis habn, damit solhs fuederlichn und an verziehn beschehe. Es sol auch ainer den anndern nicht geva^ern nach vartailn sunnder in gueter frewnndtschafft und verainigung peleibn, damit das khain tail an den anndern khainerlaÿ ta^eding noch abtrettung tu^en mu^ege, nach sol des obbemeltn aufschlags und besetzu^egn halbn, des wir dann vorgemelt von Potenndorf von Puechaim und von Paw^emkirch all dreÿ in gleicher lawt ÿeder ain brief hat und des zu mererer zewgnuss und sicherhait habn wir all dreÿ ÿeder sein aigen insigl auf dy verainigung und brief gedrukcht, darunnder wir unns verpindn alles das war und stat zu haltn, das an dem brief geschribn stet, trewlichn und ungevarlich. Geben zu Ebmfu^ert an eritag nach unnser liebn frawn tag der gepurd anno domini etc. im sechs und sibentzigistn iare.

Source Fulltext: FUCHS, Göttweig III (=FRA II/55, Wien 1902) S. 95-96