Reverendis in Christo patribus et dominis prelatis et collegiis quibuscunque per inferiorem Austriam constitutis Ludouicus dei gracia abbas Mellicensis, Sigismundus Gemnicensis et Nicolaus Maurbacensis priores ceterique prelati in dieta noviter habita Wienne¹ constituti sinceram caritatem cum oracionibus imprecantur et cuilibet vestrum innotescunt, quod pro solucione maxime summe in dieta publicate, pro qua etiam tota patria proscripta est et sine maximis dampnis solucio differri non potest, domini barones et militares spontaneos se obtulerunt ad dandum quartam partem omnium proventuum fructuum et obventionum suorum anni istius. Nos vero post multam resistentiam et allegationes hic non inferendas tandem summam, que quarte parti proventuum coequari videbatur, inter nos dividendam assumpsimus. Quare congregatis nobis unicuique imposita est summa prout sonat cedula singulariter cuique missa. cuius terciam partem ad proxima festa natalis domini (Dec. 25) solvi oportebit et reliquum ad medium quadragesime (1479 März 21), et rogamus, ut patienter feratis summas impositas et tempore solvatis constituto Wienne domino preposito Sancte Dorothee aut priori Maurbacensi, si et in quantum pacem diligitis patrie et dampna eiusdem et vestra volueritis evitare. Datum Wienne anno domini etc. LXXVIII, sexta feria ante Andree apostoli sancti festum aliquorum nostrorum sub signetis.||
Darunter ist vermerkt: Clausa sub signeto mittatur ulterius et testimonium detur nuncio in cartula, quo die vobiscum fuerit, ut sciamus omnibus hec insinuata.||
Comparuit idem nuncius in Gottwico die Barbare virginis 78 (1478 Dec. 4).

Source Fulltext: FUCHS, Göttweig III (=FRA II/55, Wien 1902) S. 125