Wir Valentin von gots gnaden dechannt, Johannes senior [und]^a das capitl des stiffts Passaw bekennen, das wir dem erbirdigen gelertten, edlen und vessten herren Wigilewsen Froschl, unnserm korbrueder und official in Osterreich, Erasm von Nuszperg haubtmann und Lienharten Kukinger, ambtmann zu Sannd Pollten, unnseren ganntzen vollmêchtigen gewallt geben haben und geben wissentlich in krafft disz briefs mit dem durchleuchtigisten fu^ersten und herrn, herren Mathiasen zu Hungern, Dalmacien, Croacien etc. kunig, herczogen in der Slesi und zu Lutzelburg, marggraven zu Merhern etc., unnserm genedigisten herrn oder s. k. g. anbellden und gewallthabern und nêmlich dem wolgeboren herren, herrn Dobusch von Boszkowicz und Schernaho, s. k. g. obristen haubtman zu Odenburg etc., in unserm namen von des stiffts herrschefft stett und geslosser lew^et gullt und gu^etter wegen in dem lannd zu Osterreich gelegen und nêmlich der statt und herrschaffts halben zu Sannd Pollten zu hanndlen, in die zu bevelhen, in zu anttburtten, die burger und inwoner daselbs irer gelu^eb und ander, damit sy dem stifft verphlicht sein, mu^eessig und ledig zu sagen, dem benannten unserm genedigisten herren, dem kunig gewondlich phlicht und gehorsam zu thun schaffen und alles das zu hanndlen, das in den sachen notturfftig sein wirdet, wir selbs tu^en sollten oder mo^echten, so wir persondlich gegenburtig wêren. Und was etc. mit urkund des brieffs pebart mit unserm aufgedruckhten insigl. Geben zu Passaw an sannd Remigitag anno domini etc. LXXXI.

Source Fulltext: FUCHS, Göttweig III (=FRA II/55, Wien 1902) S. 200