Wir Fridreich etc. den erbirdigen ersamen erberen geistlichen anda^echtigen edlen unnsern lieben getrewn . . allen und ÿeglichen den von prelaten vom adl steten merkhen und allen anderen unsern undertanen und getrewen unnsers fu^erstentumbs O^esterreich unnder und ob der Enns etc. Als wir ew die von adl auf sannd Jacobstag im snit (Juli 23) ÿecz verganngen her zu unns, als in veld gehert, geschikt zu kho^emen nagst ervadert nach laut unnser brieff darumb ausganngen, darauf uns aber ettleich aus ew geschriben und sich entschuldigt haben, das sy durch Walczlawen Wu^elczkho [von]^a Tzenaw und sein bruederschafft merklich verhindert werden denselben unseren bevelhen nachzekemen., lassen wir ew das wissen, das wir uns mit dem webelten Waczlawen und seiner bruederschafft nu betaidingt und ainen ganczen frid¹ auffgenomen haben nach laut der berednu^es und taidingbrieff auch darumb ausgangen, und emphelhen ew ernstlich und wellen, daz yr solhen frid gen dem bewellten Waczlaw und allen und ÿeglichen, so in derselben seiner bruederschafft sein, nu hinfu^er vestiklich und unzuerbrochen halldet, sŷ nicht angreiffet bekrieget beschediget, noch ŷn ander weg wekhumert in dhain weis. Auch ŷr vom adl² ew noch auf sannd Larennczentag (Aug. 10) nagst ku^enftig, als in veld gehert, geschikht mit den ewren zu rossen und ze fuessen, auf das maist und sterkist ir mu^egt, her zu unns fu^eeget, so wellen wir mit ewrem und ander der unnseren, die wir desgeleichs auch aufervodert und nu beÿ unns in merklicher anzal haben, rat hilf und beistannd wege furgenomen uns der mitwilligen krieg und ta^egleicher beschedigung aufzuhalden und lannd und leit widerumb in frid und guet wessen zu bringen und bey der phlicht, so ir unns als ewrem erbheren und lanndfu^ersten schuldig seit, auch beÿ verliessung aller ewer freihait unnd leben, so ir von unns und unnserem haws Osterreich habt, nit aufbeleibet noch annders tu^et. Welh aber darin ungehorsam sein, die wurden wir von denselben yren lehen und freihait entseczen, in die aufheben und benemen, sŷ auch in ander wege als unnser ungehorsam lanndtleut, als sich gebu^eret, straffen. Daran etc. Geben zu Wienn an freitag nach sannd Jacobstag im snit anno domini etc. LXXXII, unnsers kaisertumbs im ainsunddreissigisten jar.

Source Fulltext: FUCHS, Göttweig III (=FRA II/55, Wien 1902) S. 203-204