Wir Fridreich etc. embieten den erwirdigen ersamen erberen geistlichen andechtigen edeln unnseren lieben getrewen N. allen unnsern preleten, den vom adel steten merkten und auf dem lannde in unnserem furstentumb Osterreich ob des Wiennerwalds allenthalben gesessen und wanhafften, den der brief geczaigt oder verkundt wirdet etc. Wir haben furgenomen unnser stadt und gslos Hainnburg, so der kunig von Vngern iecz belegert hat,¹ und swerlich arbait zu beschu^etten dorauf meintlich auffervodert, ain mercklich anzal volks zu rossen und zu fuessen auffgenomen und unns mit Waczlawen Wulczko und seiner bruederschafft vertragen, emphelhen wir ew allen und ewr yedem besunder ernstlich und wellen, wann ir von unnseren lieben getrewen Reinprechten von Walsee, unserem rate, und Wolfgangen Meylestorffer, unnserm pfleger zu Achstein, oder ain aus in dorumb angelangt werdet, das dann ir unnser preleten, von steten und merkten in dye ewren zu rossen und zu fuessen, wer zu der wer geschickt sein, zu in perso^enlich fu^eget also, das ir auf sandt Laurenczientag (Aug. 10) nachkomenden mit in hye seÿt zu helffen mitsambt den, so aus dem reich pey unns seind, auch annderen den unnseren, so wir desgeleichs auffervordert haben, und unnseren dienstleutten obgemelt dye beru^ertten unnser stat und geslos, doran unns lannden und leutten mergklich gelegen ist, zu erretten und zu beschu^etten, des wir hoffen mit der hillf gocz ku^erczlich zu verbringen und ew dorinn kaynerley sachen besunder ew dye preleten, von steten merckten und unnser urbarlewt den anschlag und anlehen yecz auf ew beschehen doran nicht verhindern noch irren lasset, sunder mit aller ewer macht, als das dye gros notdurfft ervodert, gehorsamlich auffseyt und solh beschu^ettung zu thun helffet und dorinn bey vermeydung unnser swaren ungnad und straf, auch verliesznusz aller ewer freyheyt und lehen, so ir von unns, unnser vorderen am reych oder fursten von Osterreych habt, nicht annders tut etc. Geben zw Wienn an sunttag nach sannd Jacobstag im snŷt anno domini etc. LXXXII, unnsers kaisertumbs im XXXI. jar.

Source Fulltext: FUCHS, Göttweig III (=FRA II/55, Wien 1902) S. 205