Valentinus dei gracia decanus, Johannes senior et capitulum ecclesie Pataviensis capitulum facientes et representantes universis et singulis abbatibus prepositis decanis ecclesiarum parrochialium rectoribus seu vicegerentibus eorundem ceterisque presbyteris curatis et non curatis per diocesim Pataviensem infra et supra Anasum ubilibet constitutis salutem et sinceram in domino caritatem. Iam dudum manifestum esse credimus, quomodo defuncto quondam reverendissimo domino Udalrico tunc episcopo Pataviensi, prout de iure et privilegio tum ecclesie tum eciam nacionis Germanice ad eleccionem futuri pontificis processerimus atque reverendo in Christo patre domino Friderico Mawrkircher utriusque iuris doctore concordem et canonicam eleccionem fecerimus decretumque eleccionis super ipsa eleccione confectum manibus propriis omnium eligentium subscripserimus in veri consensus testimonium. Et post eleccionem huiusmodi sub forma prefati decreti secundum canonicas tradiciones debito tempore ad summum dominum nostrum, dominum Sixtum divina providentia papam quartum tunc regentem eiusque sanctam sedem apostolicam per procuratores et coelectores nostros ad hoc specialiter per nos deputatos et constitutos destinaverimus necnon confirmacionem prefate eleccionis nostre canonice humili cum instancia postulaverimus. Nichilominus tamen circumvento summo domino nostro prefato per surrepcionem et obrepcionem et quorundam sua propria commoda querentium sinistram intercessionem ipse summus dominus noster cuidam reverendissimo in Christo patri et domino, domino Georgio tituli sancte Lucie in Silice presbytero cardinali de prefata Pataviensi ecclesia causa eleccionis minime cognita taliter, qualiter providit, confirmavit et consecravit ad eandem. Verumtamen cum huiusmodi grandis et enormis lesio tum iuris communis et privilegiorum nostre ecclesie Pataviensis tum nationis Germanice ad nos pervenisset, decretis sanctorum patrum inherere volentes, qui inter alia statuerant, ut si cui a sede apostolica certa mandata destinarentur, que mentem eius exasperent, et si illis in continenti non paret, sed causam allegat racionabilem, cur id fieri non debeat, patienter sustinebit. si non fia[nt],^a que prava fuerint, narracione suggesta, recte demonstrans maiores causas ad sanctam sedem apostolicam refferri debere et iniquorum mandatorum effectum ut sic suspendere nec itaque hoc ipsum non ex rebellione quadam sed tamquam obed[ientes]^a filii per appellationes nostras huiusmodi gravamina nostra ad sanctam sedem apostolicam animo et intencione devolvendi retulimus. Sanctissimum dominum nostrum tamquam male informatum tum melius informandum humiliter huiusmodi nostras appellationes proponi fecimus et commissionem earundem atque iustitiam desuper nobis administrari petivimus, quem cause cognicionem manuum nostrarum subscripcione et iuramenti prestatione fallere indignam existimavimus. ne fides et iuramentum essent vinculum iniquitatis. Sed hew quante adversitates in lacerandis ecclesie Pataviensis privilegiis et libertatibus bonis rebus et proventibus ipsius tum etiam nos in statibus nostris a prefato reverendissimo domino cardinali et suis tamquam a iudice et actore et in causa sua propria tum per den[unti]aciones^a previsarum censurarum absque causa et obmisso processu et iuris debito etiam sustinuerimus et propter insignem Pataviensem ecclesiam, matrem nostram necnon libertates et servanda privilegia et annexa sancte iusticie sustinere coacti fuerimus, iam palam est. Intelleximus preterea, quomodo nonnulli confratres nostri, qui se a nobis pro commodo eorum privato diviserunt, se asserant capitulum et obedientie sancte sedis apostolice, qui tum nobiscum in omnibus appelationibus perstiterunt, sed tandem certis tractatibus intervenientes aversi sunt, et raciones eorum obedientie claras deducere possemus, sed pro bono pacis obmittimus. Verum cum sint dumtaxat quatuor, nos vero sedecim sanior et maior pars, quomodo se capitulum nominare possunt, que illorum possit esse auctoritas, vestrum sit iudicium. Et si reverendissimus quondam dominus cardinalis aliquid iuris in et ad ecclesiam Pataviensem habuisset, quod tamen nunc concedimus tamen per obitum prefati cardinalis etiam, cuius violenta administracio rerum et auctoritatis ecclesie ad nos tamquam capitulum denuo esset devolutum, quocirca vos omnes et singulos supradictos et quemlibet vestrum in solidum tenore presentium per viscera Iesu Christi et merita patronorum nostrorum sub debito prestite obedientie requirimus et hortamur in domino atque districte precipientes mandamus, quatenus nunc et in posterum nos tamquam indubitatum capitulum et insignem nostram Pataviensem ecclesiam matrem vestram ac eius auctoritatem et superioritatem recognoscitis. omnibus et singulis quondam previsis, archidiaconis decanis officialibus et aliis quibuscumque personis nuper per reverendissimum dominum cardinalem vobis et cuique vestrum cuiuscumque status prepositis in futurum non obediatis aut eorum mandata ac iurisdictionem et sentencias quascumque tamquam a non iudice latas audiatis acceptetis neque advertatis neque aliud dominium et superioritatem, quantam saltem de iure et consuetudine Pataviensis ecclesie debeatis ac teneamini. queratis aut vendicetis. sed singulas causas tam fori contentiosi quam etiam conscientie huc ad nos deferatis. donec pro singulis locis et offitiis officiales deputemus et desuper nostris litteris requiramini, solo nostro officiali Wiennensi, cuius adhuc valida est auctoritas, excepto. Volumus etiam, ut omnes et singulas collectas ad fabricam ecclesie Pataviensis huc magistro fabrice presentetis et causas matrimoniales et alias personas auctoritate indigentes huc ad nos remittatis. Mandamus etiam omnibus et singulis officialibus, decanis rurarilibus^b et precipue denano rurali in Anaso districte precipiendo sub pena excommunicacionis late sentencie trium dierum canonica monicione premissa, ne se in posterum de aliqua auctoritate et iurisdictione tam fori quam conscientie intromittant neque alter eorum se intromittat, quorum tenore presentis omnem commissionem et auctoritatem illis aufferimus et tollimus, donec et quousque aliud a nobis habuerint in mandatis, inhibentes vobis omnibus et singulis sub pena predicta, ne Wilhelmum Ahaimer, Georgium Mair, Ulricum de Albm et Georgium Hohenfelder pro capitulo habeatis et reputetis neque eisdem de bonis et rebus atque proventibus nostris et ecclesie Pataviensis respondeatis neque ad subripiendum huiusmodi bona auxilium et consilium directe vel indirecte prestetis neque earundem monita advertatis, sed tamqum adversarios ecclesie Pataviensis habeatis et evitetis. Si qui vero inobedientes et rebelies in hoc reperti fuerint, contra eosdem iusticia mediante procedemus, prout ordo dictaverit rationis, super quo unumquemque reddimus certiorem per presentes. Datum sub sigillo nostro capitulari die quarta decima mensis octobris anno domini etc. octogesimo secundo.

Source Fulltext: FUCHS, Göttweig III (=FRA II/55, Wien 1902) S. 206-209