Friderich von gots gnaden Romischer kayser etc. Edler lieber getrewr! Wir haben dir vormals geschriben und bevolhen den ersamen geistlichen unnsern lieben andechtigen Mathesen abbt zum Go^etweig, unnsern rat, umb den vogthabern, so du von unnsers gsloss Lempach wegen, so du von unns in satzweis innhast, an in ervordrest, unangelanngt und unns den raichen ze lassen nach laut unnserer brief darumb ausganngen. Werden wir bericht, wie du mainest, daz derselb vogthabern erblich zu demselben unnserm gsloss geho^ere. Und aber weilent Conrat Ho^elltzler, als er das gedacht gsloss von unns in phlegweis inngehabt, denselben habern auf unnser vergunnen auf ettwas zeit und annder unser phleger daselbs vor noch darnach den darzu nicht ingenomen haben, darumb uns nicht gemaint ist dir den in den berurten dein satz ziehen ze lassen. Demnach emphelhen wir dir ernnstlich und wellen, daz du den benannten abbt umb den berurten vogthabern unangelanngt und unbekumbert und unns den zu unnsern hannden raichen lassest, als dir das ze tun geburt. Daran etc. Geben zu Lynntz an eritag vor dem heiligen phingsttag anno domini etc. LXXXXIII, unnsers kaysertumbs im zwayundvierzigisten jare.||
Adresse: Dem edln unnserm lieben getrewn Dobeschen von Bozkowitz und Tschernahor, unnserm rat und obristen veldhaubtman.

Source Fulltext: FUCHS, Göttweig III (=FRA II/55, Wien 1902) S. 269