Inter negotia militantium seculo precipuum sanis mentibus id esse dinoscitur et donum gratie singularis, si diem extremi iudicii operibus misericordie preueniant homines, iuxta eruditorum propheticam peccata sua suis elemosinis redimentes. Notum sit igitur uniuersis scriptum presens intuentibus, quod ego Dithmarus de Engelschalsvelden ob meorum remissionem peccaminum parentumque meorum ad augendum diuini cultum seruitii, qui per uiros religiosos in ecclesia sancte crucis domino deo incessabiliter exhibetur, in Emzeinsdorf et in Langental redditus quatuor talentorum eo modo, quo iure paterne successionis possederam, libere contuli fratribus ecclesie memorate. Vt autem hanc donationem meam in extremis meis factam quiete possideant memorati fratres ecclesie supradicte, presentem cedulam impensione sigilli proprii statui roborandam testibus idoneis nichilominus subnotatis, qui sunt Wichardus dictus de Sleht, Ůlricus dictus de Vihouen, Albero de Paden, Ditricus dictus Geschurre, Otto dictus super baculum et alii quam plures. Acta sunt hec anno ab incarnatione domini M.° CC.° LXXI.° XVII.° calendas Nouembris.

Source Fulltext: WEIS, Heiligenkreuz (=FRA II/11, 1856) S. 179