Quoniam ab etate et sapientia nos antecedentibus contra pestiferos conatus malignorum hominum veritatis vnionem gladio lingue mendacis lacerantium scripturarum remedia sunt inuenta, eapropter ego Margareta dicta soror Marcelli, relicta Sibotonis de villa, que hungarico ydiomate Schassen, theutonico vero Winden uocatur dicti, quidquid in eadem villa sub nomine dotis a meo marito predicto mihi traditum possidebam, videlicet quinque talentorum redditus vt infra scriptum est distinctos, de curia, quam una cum marito meo dicto inhabitabam, in quem colitur mansus unus et dimidius, XII solidos, de manso uno in superiori parte ville in winden siue hungarice lingue Schassen dicte situato unum talentum denariorum, item in parte inferiori vnum mansum soluentem unum talentum denariorum, item ibidem dimidium mansum soluentem dimidium talentum denariorum, et tres areas soluentes sex solidos denariorum, quatuor quoque urnas vini minus dimidia iuris montani ibidem pro LX. denariis conputatas seu taxatas, cum quorum anumeratione quinque talentorum redditus supplentur, dominis meis Heinrico venerabili abbati et fratribus monasterii sancte crucis in Austria Cysterciensis ordinis, ad quos tocius ville supradicte proprietas libere pertinere dinoscitur ab antiquo, coram fratre Rudewano commendatore domus hospitalis sancti Johannis in Supprunio presentibus Petro comite, Perone iudice, comunitateque ciuium in Supprunio in loco placiti siue iudicii comunis pro XXI talentis denariorum wiennensis monete, quos denarios per manus fratris Rudewani commendatoris predicti suscepi, vendidi cum omnibus suis vsibus ad manus fratris Alberti monachi sancte crucis pro huiusmodi negocio ab abbate suo predicto specialiter directi, memorata bona resignans et assignans libere spontanea voluntate ita, quod nullo umquam tempore de eisdem michi meisque heredibus seu amicis occasio seu facultas maneat repetendi, filio meo Nycolao ex altero mihi marito genito nullumque in premissis bonis, ut coram fratre Rudewano et personis antedictis ipso attestante declaratum extitit ius habente propter maiorem tamen cautelam mihi in hiis omnibus annuente. Vt autem hec perpetua caucione firmentur, presentem litteram conscribi feci sigillis fratris Rudewani commendatoris domus hospitalis sancti Johannis in Supprunio, comunitatisque ciuium ibidem comunitam, subnotatisque testibus approbatam et per omnia stabilitam, qui sunt, Petrus comes, Pero iudex Suppruniensis, Stephanus Swœrtzlo, Otto filius Ortolfi, Libhardus, Paulus, Nycolaus filii Wolfhardi, et alii quam plures. Actum et datum anno domini M.°CC.°LXXIIII.° in vigilia beati Johannis Baptiste.

Source Fulltext: WEIS, Heiligenkreuz (=FRA II/11, 1856) S. 188-189