Otakarus dei gracia Bohemorum rex, dux Austrie, Styrie et Karinthie, marchioque Moravie, dominus Carniole, Marchie, Egre et Portus Naonis omnibus presencium noticiam habituris in perpetuum. Quoniam auctor omnis gracie ad hoc nos honorum et facultatum culmine sublimauit, ut sibi famulantes tanto propensioribus mvnificencie nostre donis fulciantur, quanto latioribus terrarvm gubernaculis dominamur, eo moniti instinctu tam presentibus quam futuris notum facimus, quod nos fratribus monasterii sancte crucis in Austria Cysterciensis ordinis de benignitate regia indulsimus, vt aput castrum nostrum Newenburch supra Pataviam situm naves deferentes duo talenta salis maioris ligaminis annis singulis absque mvta, theloneo et exactione cuiuscumque iuris per Enum deducant libere, quemadmodum eis in singulis locis mutarum nostrarum circa danubium est indultum. Et si quando ex suis defectibus eosdem sales deducere non valuerint, per||
quemlibet sibi fidelem in expensis et nauibus alienis ac si in propriis deducendi plenam habeant facultatem. Porro si quis de Austria seu de aliis terris nostri dominii, uel etiam de uectoribus eiusdem salis alicui soluere quidquam debuerit, propter hoc predicti fratres a nullo quomodolibet inpediantur, sed res eorum abire libere permittantur. Ut autem hec nostre donacionis gracia ipsis perpetuo maneat inconuulsa et nobis oracionum suarum semper proueniant suffragia salutaria, presentem paginam super hiis conscriptam duplicis nostri sigilli munimine ipsis fecimus roborari. Datum Wienne anno domini M.°CC.°LXXIIII.° Idibus Maii.

Source Fulltext: WEIS, Heiligenkreuz (=FRA II/11, 1856) S. 187-188