Wernhardus dei gracia Ecclesie Patauiensis Episcopus, tam presentibus quam futuris Judicibus suis in Patauia graciam suam et omne bonum. Cum nos visis et diligenter examinatis priuilegiis nostris et predecessorum nostrorum de consensu venerabilis capituli nostri super hec datis Monasterio sancte crucis Cysterciensis ordinis in salibus suis, in quibus libertatem quoad mutam in Patauia et Obernperg obtinet, libertatem in transitu, qui vulgariter furuart dicitur, in Patauia specialiter recognoscamus, quocumque tempore eosdem sales deduci contigerit, ita quod nulli iudici ad exhibicionem alicuius exhibicionis, exaccionis, uel mute, sev thelonei teneantur racione transitus antedicti, prouidenciam vestram hortamur mandantes vobis nichillominus sub obtentu gracie nostre districte, quatenus predicto Monasterio, circa premissa nullum grauamen vel inpedimentum prestare aliqualiter presumatis, cum nos pocius in Judicacione nostri pensione (sic) talem exaccionem vellemus deducere, quam nostra et predecessorum nostrorum priuilegia suo vacuari vigore. Datum Chremis anno domini Millesimo Trecentesimo quarto, decima Kalendas Aprilis presentibus nostro sigillo in testimonium roboratis.

Source Fulltext: WEIS, Heiligenkreuz (=FRA II/16, 1859) S. 15