Ich Otte von Zelkingen zu den Zeiten Havptman ze Prukke, vnd ich Elzbet sein havsvrowe wir veriehen vnd tvn chvnt allen den, di disen prief lesent oder horent lesen, di nv lebent vnd hernah chunftich sint, Daz wir vnsers rehten gechavften Aigens Drev Lehen vnd ain Hofstat, die da ligent da ze Mavstrenck, die da dient alle Iar an sant Jorgen tage ainen phenning vnd zwai phunt Wienner phenninge Vnd an sand Michels tage zwai phvnt wienner phenninge, vnd die wir gechavft haben wider den erbaern man Vlrichen von Michilstetten vnd wider sein havsfrowen vron Agnesen vmb fivnf vnd vierzich phvnt wienner phenninge, der wir sie reht vnd redlichen gewert haben; Vnd da sie vns ze rehter ebentevre vnd ze Scherme vber gesatz habent irs rehten aigens vier phvnt wienner phenninge geltes Vnd einen phenning geltes avf ir Maierhove, der da leit ze Wetzzelstorf vnverschaidenlichen zu samt In. Die vorgenanten Drev Lehen, vnd die Hofstat da ze Mavstrench haben wir mit gvtem willen vnd mit gesamter hant zv der zeit, do wir iz wol getvn mochten‚ geben mit allem dem nvtz vnd reht, als sie der vorgenant Vlrich von Michilsteten vnd sein havsvrowe vro Agnes vnd avch wir In Aigens gewer her praht haben‚ lavterlichen dvrh Got vnd dvrh vnser Vodern sele willen, vnd avch dvrh vnser selber sele hayl dem erbaern manne Apt Jorgen vnd der Samnvnge zv dem Hailigen Chrevtzze also, daz sie da mit fvrbas allen irn frvmen schaffen, verchavffen, versetzzen vnd geben, swem sie wellen an allen irresal, Vnd daz sie vnd alle ir nahchomen vnser vodern sele vnd vnser sele ewichlichen da von gedenken, Vnd dar vber durch pezzer Sicherhait so haben wir mit des vorgesprochen Vlriches von Michilsteten vnd seiner havsfrowen vron Agnesen gvtem willen vnd gvnst, vnd avch mit ir handen die vorgenanten vier phvnt geltes vnd den ainen phenning geltes avf ir hove da ze Wetzzelstorf, die sie vns vber die drev Lehen vnd vber die Hofstat da ze Mavstrench ze ebentevre vnd ze scherme gesatz habent, vnverschaidenlichen zv samt in gesatz dem vorgesprochen Apt Jorgen vnd der Samnvnge gemaine zv dem Hailigen Chrevtzze vnverschaidenlichen zv samt vns vnd dem vorgenanten Vlrichen von Michelsteten, vnd seiner havsvrowen vron Agnesen vber die vorgesprochen Drev Lehen vnd vber die Hofstat da ze Mavstrench ze rechten scherme fvr alle ansprache, als aigens reht ist vnd des landes reht ze Osterreiche, Und geben in dar vber disen prief ze ainem sichtigen vrchunde, Vnd ze ainem offen gezevge, vnd ze ainer ewigen vestunnge diser sache versigilten mit vnserm Insigil Vnd sint avch des gezevg her Stephan von Mayssawe. her Wichart von Pavmgarten. her Chadolt sein prvder. her Greiffe von Wienne. her Otte hern Haymen prvder. her Chvnrat der Hvbmaister. her Vlrich bei den Minnern prvdern, Vnd ander frvme levte genuch, den dise sache wol chvnt ist. Diser prief ist geben ze Wienne, do von Christes gebvrt waren ergangen Drevzehen Hvndert Iar. In dem Sechsten Iare darnah, an vnser vrowen tage der Liehtmesse.

Source Fulltext: WEIS, Heiligenkreuz (=FRA II/16, 1859) S. 19-21