Ich Vlrich von Michilsteten vnd ich Agnes sein havsvrowe, Wir verichen vnd tvn chvnt allen den, die diesen prief lesent oder horent lesen, di nv lebent vnd hernah chvnftich sint. Daz wir mit vnser erben gvten willen vnd gvnst mit verdahtem mvte, Vnd mit gesamter hant zv der zeit, do wir iz wol getvn mohten, verchovft haben vnsers rechten vreien aigens Drev Lehen, vnd ain Hofstat, die da ligent ze Mavstrench, vnd die da dient alle Iar an sand Jorgen tage Zwai phvnt phenninge Vnd an Sand Michelstage zwai phvnt phenninge Wienner mu^entz; Die vorgenanten Drew Lehen vnd die Hofstat haben wir geben mit allem dem nvtz vnd reht, als wir sie in aigens gewer her praht haben, Vmb fivnf vnd vierzich phvnt Wienner phenninge, der wir reht vnd redlichen gewert sein, dem erbarn Herren hern Otten von Zelkingen ze Schala gesezzen zv den Zeiten Vnd seiner havsvrowen vron Elsbeten ledichlichen vnd vreilichen ze haben, vnd allen irn frumen da mit ze schaffen, verchavffen, versezzen vnd geben in swelhes Chloster si wellen an allen irresal. Vnd sein avch wir, ich Vlrich von Michilsteten. vnd ich Agnes sein havsvrowe der vorgenanten Drew Lehen vnd der Hofstete da ze Mavstrench hern Otten von Schala vnd seiner havsvrowen vron Elzbeten, oder in swelhes Chloster sev sie gebent‚ rechter gewer vnd scherm fvr alle ansprache, als aigens reht ist vnd des landes reht ze Osterreiche. Vnd dar vber dvrch pezzer Sicherhait, so haben wir mit gesamter hant gesatz vnsers rehten aigens vier phvnt wienner pheninge geltes auf vnserm Maierhowe, der da leit da ze Wetzzelstorf dem vorgenanten hern Otten von Schala vnd seiner havsvrowe vron Elzbeten, oder avf swelhes Chloster sie die vorgesprochen Drew Lehen vnd die Hoffstat gebent, vnverschaidenlichen zv samt vns vber die selben Drew lehen vnd vber die Hofstat da ze Mavstrench ze rechten scherme fvr alle ansprache‚ als aigens reht ist vnd des landes reht ze Osterreiche. Vnd geben in dar vber disen prief ze ainem sihtigen vrchunde Vnd ze ainem offen gezevge Vnd ze ainer ewigen vestnvnge dieser sache versigilten mit vnserm Insigil‚ vnd sint avch des gezevg: her Stephan von Meyssawe. her Wichart von Pavmgarten. her Chadolt sein prvder. her Hainrich von Liehtenstain. her Alolt vnd her Stephan die prveder von Ha^vwenvelde. Christan hern Otten aidem von Schala vnd ander frvme levte genvch. Diser prief ist geben ze Wienne, do von Christes geburt waren erganngen Tavsent Iar, Drev Hvndert Iar‚ in dem Sechsten Iare dar nah; an dem achten tage nah dem Perhtage.

Source Fulltext: WEIS, Heiligenkreuz (=FRA II/16, 1859) S. 18-19