Stephanus dei gracia Palatinus Comes Reni Dux Bawarie Mutariis suis in Purchhavsen et Schaerding graciam suam et omne bonum. Pio fauentes effectu peticionibus venerabilium abbatis et Conuentus sancte Crucis in austria Ordinis Cysterciensis Patauiensis Dyocesis eisdem indulsimus de nostre liberalitatis gracia speciali et specialiter ob karissimi patris nostri diue memorie ac aliorum progenitorum nostrorum remedium et salutem, quod duo talenta salis maioris ligaminis, quam graciam a fratre nostro karissimo sunt iam pridem assecuti, singulis annis semel eis transire debeant sine muta. Volumus igitur et firmiter ac districte mandamus, quatenus huiusmodi graciam prefatis, abbati et Conventui ac monasterio suo tam per nos, quam per predictum patrem nostrum olim factam eisdem debeatis absque omni exactione thelonei, siue mute, sev quolibet alio detrimento inuiolabiliter et perpetuo conseruare. Ipsi etiam prelibati abbas et Conuentus nobis promiserunt firmiter et sincere, quod in reconpensam talis gracie sibi facte anniuersarium predicti patris nostri diue recordacionis, cum nostra et progenitorum nostrorum commemoracione speciali deuote annis singulis celebrabunt. In quorum omnium euidens testimonium atque robur presens Instrumentum eis dedimus nostri maioris sigilli robore communitum. Datum apud Lantshutam anno domini Millesimo CCC°. sexto. In die beati Nycolai Episcopi.

Source Fulltext: WEIS, Heiligenkreuz (=FRA II/16, 1859) S. 21