Ich Irmgart des Cv^oenrats housvrowe, der weilen purgermaister was ze wienn in der Stat, vnd Hicz der Pvlle vergih an diesem brief vnd tven chunt allen laeuten, de in sehent, lesent oder ho^erent lesen, daz ich mit wol verdahtem mv^oet vnd mit gv^oetleichem willen, dv ich iz wol getv^oen moht an alle wider red aller laeut, vnd svnderleich meiner chinde vnd meiner vreunt, swer si sint, oder swie si genant sint, nah der ebe^enung, di ich mit meinen chinden getan han; dev wol chunt ist frumen laeuten vnd purgern von der Stat, der prief vnd insigel ich dar vber han, ledichleich vnd vreileich geschaft vnd gegeben han dem Abt Gorgen vnd der Samnung des Hailigen chraeuzes, ein phunt geltes ze wienn vor der Stat ovf einem acher pei dem Renneweg also beschaidenleich, Daz si da von durch der trewen vnd ovch der andaht willen, die ich vnd mein wiert, der vor genant her Chv^oenrat, zv in vnd zv^oe ierem Gotes hovs gehabt haben vnd immer haben, leintig vnd to^et alle iar begen vnser baiden Jartach ze ier Capitel vnd in ier chirchen mit messen vnd mit vigilen nah iers o^erdens gewonhait. Vnd so man meinen iartach beget, so schol ouch meins wiertes vnd aller meiner vordern vnd aller vnser erben gedaht werden, vnd daz schol ovch sein, swenn sein iartach begangen wiert. Ouch ist vns gelubt, daz wier von in vnd mit in schuln tail haben an allem dem gotes dienst, daz si got erbietend, an aller geistlicher arbait, swie dev genant ist vnd swie si begangen wiert pei tag vnd pei naht; vnd svnderleih an den dreizzich messen, di si iaerleich phlegent ze sprechen von des hailigen chraeutzes tach vntz hintz aller hailigen messe vmb alle die, di in dehaim gv^eet getan habent mit worten oder mit werchen. Vnd darumb daz wier des alles tail haben‚ so gib ich in daz vor genant sel gerat willichleich vnd gern. Des selben gv^oetes ist Scherm der Abt von den Schotten, dem dient man da von Jaerleich einen phenning, Da gehört auch von anlait vnd ableit. Swer chouft ein viertail‚ der geit sechs phenning; Der iz verchouffet, der gait drei phenning. Man dient iz auch zwier in dem Iar, Ze Sand Gorgen messe vnd ze sand Michels messe. Vnd daz disez geschaeft stet beleib vnd vnverwandelt, dar vber geb ich in, daz ist den vorgenannten Herren, disen prief ze einem ewigen v^orchunde , versigelten mit meinem insigel. Diser prief ist ouch geschrieben vnd gegeben, do nah christes gebv^oerd ergangen warn Tousent Iar, Drev hundert Iar vnd darnah in dem Sibenten Iar ze phingesten.

Source Fulltext: WEIS, Heiligenkreuz (=FRA II/16, 1859) S. 21-22